LAJMI I FUNDIT:

Prapaskenat e ndeshjes Kosovë – Mali i Zi: ‘Selfiet’ e shumta me Albin Kurtin, përleshja në tribuna mes tifozëve, koreografia fantastike e Dardanëve, qortimi i Challandes për Vojvodën si dhe duartrokitja për Fatos Beqirajn

Prapaskenat e ndeshjes Kosovë – Mali i Zi: ‘Selfiet’ e shumta me Albin Kurtin, përleshja në tribuna mes tifozëve, koreografia fantastike e Dardanëve, qortimi i Challandes për Vojvodën si dhe duartrokitja për Fatos Beqirajn
-->

Kosova është rikthyer te fitoret në ndeshjet kualifikuese për Kampionatin Evropian, Euro 2020.

Dardanët kanë fituar tre pikë pas shkëlqimit në fushë ku në fund rezultati ishte 2-0 në të mirë të djelmoshave tanë.

Futbollistët tanë patën paraqitjen më të mirë deri më tani, ku krijuan jashtëzakonisht shumë raste shënimi dhe ia pamundësuan malazezëve të jenë të rrezikshëm.

Telegrafi si gjithmonë sjell prapaskenat e ndeshjeve të Kosovës ku në ndeshjen e djeshme kishte të shumta.

Fituesi i zgjedhjeve të fundit në Kosovë, Albin Kurti ishte për herë të parë në stadium dhe duket se i ka sjell fat Kosovës, ndërsa nuk munguan as fërkimet në fushë dhe në tribuna.

Albin Kurti injoron tribunën VIP, ulet në lindje së bashku me tifozët

Kosovarët e votuan shumë, më shumë se gjithë kandidatët tjerë për deputet dhe Albin Kurti me partinë e tij është fitues i zgjedhjeve të 6 tetorit. Vetëm një javë më vonë, Kurti mbajti premtimin e dhënë dhe u shfaq në stadiumin ‘Fadil Vokrri’ në përkrahje të Kosovës, por që nuk preferoi të ulej në tribunën VIP, duke shkuar në Lindje së bashku me tifozët tjerë. Nuk kanë munguar ‘selfiet’ e tifozëve me ‘kryeministrin në ardhje’. Ardhja e tij në stadium i solli fat Kosovës, që bëri ndeshjen më të bukur deri më tani në këto eliminatore.

Vërshëllehet himni i Malit të Zi

Federata e Futbollit të Kosovës (FFK), kishte bërë kërkesë që mos të vërshëllehet himni i Malit të Zi. Kjo kërkesë e FFK-së nuk iu kishte lënë përshtypje tifozëve, pasi me të filluar himni i malazezëve ai është vërshëllyer nga gjithë stadiumi.

Foto e përbashkët e dy ekipeve kombëtare

Para fillimit të ndeshjes dy ekipet kombëtare bënë një foto të përbashkët për lojë të ndershme.

Koreografia fantastike e Dardanëve me mbishkrimin ‘Besa Besë’

Pak para fillimit të ndeshjes, grupi i tifozëve Dardanët shpalosën një koreografi fantastike 3D. Në të ishte sulmuesi i Kosovës, Vedat Muriqi si dhe mbishkrimin ‘Besa Besë’.

Rashkaj del në nxehje vetëm pas dy minutash

Të gjithë në stadium mbetën të befasuar ku vetëm pas dy minutash lojë Anel Rashkaj u urdhërua nga trajneri Challandes të del në nxehje rreth fushës. Gjithsesi Rashkaj u inkuadrua në lojë vetëm në minutën e 82-të.

Zënkë qysh në minutën e shtatë të ndeshjes

Vetëm pas shtatë minutash lojë ishte zënka e parë në fushë mes futbollistëve, ku e nisën Vedat Muriqi dhe Vladimir Jovovic e ku pastaj u përfshinë të gjithë lojtarët, vetëm Herolind Shala qëndroi në mes të fushës duke mos rrezikuar të ndëshkohet.

Përleshje e madhe në tribuna, gjithçka nisi pasi kosovarët tentuan t’ia marrin transparentin tifozëve malazez

Një përleshje e madhe ndodhi në jug të stadiumit, ku ishin të vendosur rreth 150 tifozë serbo-malazez, pasi besohet se shumë nga ta ishin me nacionalitet serb. Gjithçka nisi pasi tifozët kosovarë tentuan t’ia merrnin transparentin malazezëve. Përleshja ishte mes dy palë tifozëve, por edhe mes mysafirëve dhe sigurimit të stadiumit.

Hyrja e Policisë së Kosovës elektrizon tifozët

Pas përleshjes mes tifozëve, në stadium u futën edhe forcat speciale të Policisë së Kosovës duke rrethuar tifozët malazez. Me tu futur në stadium PK, ata janë duartrokitur shumë nga i gjithë stadiumi.

Tifozët mysafirë nuk dëgjoheshin në asnjë moment

Sa herë që tifozët malazez merrnin iniciativë të këndonin në mbështetje të përfaqësueses së tyre, i gjithë stadiumi i vërshëllente duke bërë që thirrjet e tyre të mos dëgjoheshin fare.

Celina dhe Kololli tani ekzekutues të gjuajtjeve të lira dhe kornerëve

Bernard Challandes kishte thënë në konferencë se ka një listë të lojtarëve të cilët do të ekzekutojnë penalltitë e mundshme dhe faullet. Përderisa më parë Valon Berisha nuk e lejonte askënd të afrohej te topi në ndërprerje, në ndeshjen ndaj Malit të Zi, kornerët dhe gjuajtjet e lira ekzekutoheshin nga Celina dhe Kololli.

Duartrokitet Fatos Beqiraj në dy raste

Fatos Beqiraj nuk ishte titullar çuditërisht në këtë takim, por në minutën e 46 u inkuadrua në lojë. Pas një dueli me Fidan Alitin, sulmuesi pejan i Malit të Zi lëshoi për pak fushën i lënduar. Me tu larguar nga fusha ai është duartrokitur nga tifozët e pranishëm në shkallët e stadiumit. Të njëjtën gjë e bënë tifozët edhe në fundin e ndeshjes.

Aro Muric e gjuan përtej gjysmës topin me duar

Portieri Arijanet Muric në dy raste e ka gjuajtur nga zona e tij përtej gjysmës topin me dorë. Kjo gjë i pëlqente tifozëve të cilët në kor thërrisnin emrin e tij dhe e duartrokitën.

Rashica elektrizon stadiumin me veprimin e tij

Milot Rashica ka dhuruar spektakël edhe pse nuk shënoi gol. Anësori vushtrrias në minutat e fundit ia futi mes këmbëve topin mbrojtësit Maurisic duke elektrizuar stadiumin.

136 tifozë kishin mbetur pa u futur në stadium

Stadiumi Fadil Vokrri ka një kapacitet prej 12,630 ulëseve, por që në këtë sfidë munguan 136 tifozë. Në stadium u lajmërua se numri i saktë i tifozëve ishte 12,494 tifozë dhe këta 136 që munguan ishin nga pjesa e tifozëve malazez.

Rrahmani mbron skuadrën si kapiten i vërtetë

Amir Rrahmani është kapiten i Kosovës dhe shiritin po e mbanë me plot përgjegjësi. Sa herë që kishte ndonjë zënkë në fushë, Rrahmani vraponte për t’i dalë në ndihmë lojtarëve të tij. Amiri ka treguar se është një lider i vërtet dhe bashkëpunues me gjithë ekipin pa dallim.

Challandes qorton Vojvodën pas zëvendësimit

Mërgim Vojvoda u largua nga loja dy minuta para fundit të ndeshjes, por që u qortua nga trajneri Bernard Challandes sapo lëshoi fushën. Zvicerani e qortoi Vojvodën për zënkën që kishte në fund me kundërshtarët dhe kartonin e verdhë që mori e që ishte i shmangshëm. /Telegrafi/

Në trend Sport

Më shumë
Ancelotti ka vetëm një lojtar të paprekshëm në ekip – nuk është Vinicius as Bellingham

Ancelotti ka vetëm një lojtar të paprekshëm në ekip – nuk është Vinicius as Bellingham

La Liga
Lojtarët e Liverpoolit kanë gjetur zëvendësuesin e Kloppit, vjen përgjigja direkte nga trajneri

Lojtarët e Liverpoolit kanë gjetur zëvendësuesin e Kloppit, vjen përgjigja direkte nga trajneri

Premier League
Ancelotti paralajmëron Viniciusin pas polemikave: Tifozët e Osasunës ishin korrekt

Ancelotti paralajmëron Viniciusin pas polemikave: Tifozët e Osasunës ishin korrekt

La Liga
Barcelona po planifikon transferimin e lojtarit 'të harruar' të Bayernit

Barcelona po planifikon transferimin e lojtarit 'të harruar' të Bayernit

La Liga
Man Utd tashmë e di se sa para janë të gatshëm të paguajnë Dortmundi për Sanchon

Man Utd tashmë e di se sa para janë të gatshëm të paguajnë Dortmundi për Sanchon

Premier League
Barcelona i përgjigjet çmimit që Man Utd i ka vënë kartonit të Greenwood

Barcelona i përgjigjet çmimit që Man Utd i ka vënë kartonit të Greenwood

La Liga
Kalo në kategori