Pique shpjegoi foton që bëri bujë me Ibrahimovicin 13 vite më parë, ende mbahet mend reagimi i suedezit

Kanë kaluar 13 vite që kur Gerard Pique dhe Zlatan Ibrahimović ishin protagonistë të një fotoje që shkaktoi shumë bujë dhe se çfarë ndodhi atë ditë në parkingun e klubit, kur të dy luanin për Barcelonën, e ka shpjeguar ish- lojtari.

Pique dhe Ibra qëndruan shumë afër, në një situatë paksa të sikletshme, sikur do të putheshin dhe gjatë bisedës me Ibai Llanos në emisionin After Kings në Twitch, Pique u pyet për atë foto të famshme dhe ai nuk ngurroi të tregonte të vërtetën e tij.

“Në atë foto jemi në parkingun e klubit. Makina ime është aty dhe gazetarët janë aty. Nëse do ta puthja Zlatanin, definitivisht nuk do ta bëja në parkingun e klubit. Fotografia është krejtësisht jashtë kontekstit. Më i miri nga të gjitha ishte reagimi i Zlatanit”, ka thënë Pique duke qeshur.

Pas publikimit të fotos, gazetari e pyeti sulmuesin suedez nëse ishte homoseksual dhe Ibra u përgjigj në stilin e tij.

“Jo, jo, ti dhe motra jote mund të vini tani dhe unë të të vërtetoj se nuk jam homoseksual”, kishte thënë atëherë Ibra.

Pique i tha revistës FourFourTëo më herët se ishte një keqkuptim dhe se ai iu afrua Zlatan për ta uruar atë vetëm pas publikimit të autobiografisë së tij, pas së cilës një fotograf bëri një foto të tyre duke shtrënguar duart./Telegrafi/