Petrovska: Integrimi evropian është forcë lëvizëse për Ballkanin Perëndimor

Ministrja e Mbrojtjes, Sllavjanka Petrovska sot në Krems të Austrisë mori pjesë në takimin ministror për bashkëpunim në mbrojtje të Evropës Qendrore dhe vendeve të Ballkanit Perëndimor, ku u diskutua për perspektivën evropiane të vendeve të rajonit.

Ajo tha se këto kohë sfiduese përfaqësojnë gjithashtu një mundësi unike për të gjithë ne për të forcuar bashkëpunimin e sigurisë dhe për të intensifikuar dialogun e ndërsjellë.

“Rajoni i përket Evropës dhe Bashkimit Evropian, ndërsa vendet tona, veçanërisht Maqedonia e Veriut, kanë treguar se janë të përkushtuara ndaj parimeve dhe vlerave evropiane. Procesi i anëtarësimit duhet të jetë i besueshëm, sepse, integrimi evropian është motivimi më i fortë për zhvillim dhe është ideja më e mirë që lidh rajonin”, tha Petrovska.

Në kuadër të Bashkëpunimit të mbrojtjes së Evropës Qendrore, ministrja e Mbrojtjes tha se vendet anëtare janë jashtëzakonisht të rëndësishme në mbështetjen e procesit të anëtarësimit, veçanërisht në ngritjen e kapaciteteve për të luftuar korrupsionin dhe krimin e organizuar, duke punuar sipas parimeve të qeverisjes së mirë dhe funksionimit të shtetit ligjor.

“Ballkani Perëndimor nuk ka kohë për një tjetër momentum të humbur në procesin e integrimit evropian. Unioni duhet të jetë pragmatik, për të mundësuar akses më të lehtë në projektet investuese, ndërsa veçanërisht në ndërtimin e institucioneve dhe shoqërive demokratike. Maqedonia e Veriut është fuqishëm e përkushtuar ndaj procesit të shqyrtimit tashmë të filluar, sepse për ne integrimi në Union është shtysa më e fortë për demokracinë, prosperitet dhe siguri për të gjithë qytetarët tanë”, theksoi ministrja e Mbrojtjes.