Përplasjet midis Armenisë dhe Azerbajxhanit, numri i viktimave shkon në 32

Përplasjet midis Armenisë dhe Azerbajxhanit për territorin e diskutueshëm të Nagorni-Karabakut kanë vazhduar edhe brenda natës.

Sipas medieve të huaja, përcjell Telegrafi, lajmi u konfirmua nga ministria e mbrojtjes në Armeni, derisa autoritetet e Azerbajxhanit deklaruan se pala tjetër bombardoi qytetin e Terterit.

Tensionet midis dy republikave ish-sovjetike vijnë pas konfliktit mbi territorin Nagorni-Karabaku, një zonë e cila gjendet në Azerbajxhan mirëpo është e populluar me shumicë armene.

Autoritetet e Nagorni-Karabaut deklaruan të hënën se rreth 15 ushtarë vdiqën brenda natës, duke e çuar numrin e përgjithshëm të fatalitetit ushtarak në 32 që kur përplasjet shpërthyen të dielën në mëngjes.

Në mesin e përplasjeve raportohet edhe për vdekjen e civilëve.

Zyrtarët tek territori i diskutueshëm deklaroi se një grua armene dhe një fëmijë u vranë, ndërsa Baku deklaroi se një familje azere pesë anëtarëshe kishte vdekur si pasojë e bombardimit nga forcat armene.

“Jemi të lodhur nga kërcënimet e Azerbajxhanit, ne do të luftojmë deri në vdekje derisa të zgjidhet ky problem një herë e mirë”, tha Artak Bagdasaryan 36 vjeçar, duke shtuar se ai do t’ju bashkohej ushtrisë së Armenisë. /Telegrafi/