Lulzim Peci, drejtor i institutit KIPRED, ka reaguar sot pas deklaratës së presidentit të Serbisë, Aleksandar Vuçiq se Britania e Madhe po e pajisë Kosovën me raketa anti-tanke.

Peci në një postim në Facebook shkruan se Britania e Madhe është vënë në “hot spot” të sulmeve dhe dezinformatave të koordinuara në mes të Serbisë dhe Rusisë dhe kjo nuk është ngjarje e rastit.

Ai më tej thekson se ka më se tetë muaj që këto sulme në Kosovë ishin të përqendruara në veçanti në Ambasadën e Mbretërisë së Bashkuar në Kosovë, në Kryesuesin e Misionit të OSBE-së në Kosovë – Ambasadorin e Mbretërisë së Bashkuar Michael Davenport dhe në inteligjencën britanike.

Lexo po ashtu:
Një aeroplan i Forcave Ajrore i Britanisë së Madhe ateroi në Prishtinë Një aeroplan i Forcave Ajrore i Britanisë së Madhe ateroi në Prishtinë

Lexoni të plotë postimin:

Britania e Madhe është vënë në “hot spot” të sulmeve dhe dezinformatave të koordinuara në mes të Serbisë dhe Rusisë dhe kjo nuk është ngjarje e rastit.

Ka më se tetë muaj që këto sulme në Kosovë ishin të përqendruara në veçanti në Ambasadën e Mbretërisë së Bashkuar në Kosovë, në Kryesuesin e Misionit të OSBE-së në Kosovë – Ambasadorin e Mbretërisë së Bashkuar Michael Davenport, dhe në inteligjencën britanike, për komplotim kundër komunitetit serb në Kosovë, përmes përkrahjes së intervenimit të Policisë së Kosovës në pjesën veriore të Kosovës, që ishte pjesë e operacionit kundër krimit të organizuar që ndodhi në tërë Kosovën, më 13 tetor 2021, si dhe për “përkrahjen” e vendimit të Qeverisë dhe të Kuvendit të Kosovës për të mos e lejuar mbajtjen në territorin e Kosovës të referendumit për ndryshimet kushtetuese në Serbi.

Tani këto sulme janë duke vazhduar me akuzimin e Britanisë se Madhe për armatim të Kosovës. Kësaj pune i thonë, mos e vet se të kallxon vet.

Në këtë situatë do të ishte gabim i rëndë i perëndimit nëse Vuçiqit i jepet roli i “njeriut të paqes” ashtu si ju dha edhe Millosheviqit pas Marrëveshjes së Daytonit, duke ia lënë të hapur hapësirën e manovrimit në raport me Brukselin e Washingtonin në kurriz të fqinjëve të Serbisë.

Gabimet e tilla mund ta kthejnë shumë lehtë rajonin në vitet e 1990-ta dhe këto nuk duhet të lejohen. Puna e përbashkët e Kosovës me Malin e Zi dhe Kroacinë, në këtë situate e cila shikohet me thjerrëza të tjera nga Tirana zyrtare, duhet të jetë prioritet i Qeverisë së Kosovës në zmbrapsjen e Vuçiqit dhe këndelljen e perëndimit për pritjet që i kanë nga “njeriu i paqes”. /Telegrafi/