Pamje rrëqethëse në Indi – treni kalon mbi një grua dhe dy fëmijët e saj, të tre shpëtojnë për mrekulli

Një grua dhe dy fëmijët e saj mbijetuan mrekullisht pasi një tren kaloi mbi ta në një stacion hekurudhor në Bihar. Një video rrëqethëse e regjistruar nga njerëzit tregon nënën duke u përkulur mbi fëmijët e saj në shina ndërsa treni kalon me shpejtësi nëpër stacion, duke kaluar mbi ta.

Të shtunën, gruaja dhe fëmijët e saj arritën në stacionin hekurudhor të Barh në Bihar për të hipur në Vikramshila Express për në New Delhi së bashku me familjen e tyre. Kur një grup i madh i njerëzve filluan të hipnin me nxitim, të tre u shtynë nga platforma dhe ranë në shina.

Kaosi pasoi ndërsa pasagjerët bërtisnin për të shpëtuar familjen pasi treni filloi të largohej nga stacioni. Në panik, nëna u përkul mbi fëmijët e saj, duke i mbrojtur ata nga ajo që do të vinte.

Mendimi i saj i shpejtë tronditi pasagjerët të cilët shikonin të trembur teksa treni me shpejtësi kalonte mbi familjen, duke i lënë të paprekur, raporton nypost.

Brenda pak sekondash, treni është larguar dhe gruaja shihet e palëvizshme në shina. Me shpejtësi, një grup pasagjerësh hidhen poshtë në shina për t’i tërhequr të tre përsëri në platformë.

Burri i gruas, i cili ishte ndarë nga familja e tij, u hodh nga treni dhe vrapoi përsëri në stacion, thanë zyrtarët. Familja u dërgua në një spital për kontrolle mjekësore. Gjendja e tyre raportohet të jetë e qëndrueshme. /Telegrafi/