Pacolli: Shoqëria civile ka dhënë kontribut të rëndësishëm në politikën e jashtme

Zëvendëskryeministri dhe ministri i Punëve të Jashtme (MPJ), Behgjet Pacolli ka marrë pjesë në tryezën e diskutimit të organizuar nga Instituti i Prishtinës për Studime Politike, PIPS të titulluar “Politika e Jashtme Kosovare: Prioritetet dhe Sfidat”.

Kështu thuhet në njoftimin e dërguar nga MPJ-ja.

Më tutje në këtë njoftim thuhet se kreu i diplomacisë kosovare, referoi mbi rolin dhe rëndësinë e përfshirjes së shoqërisë civile përkitazi me këtë çështje; kapitalizimin e procesit të njohjeve të Republikës së Kosovës; reformat që po ndodhin në Ministrinë Punëve të Jashtme, diplomacinë ekonomike si dhe mbi fazën përfundimtare të dialogut me Serbinë.

Sa i përket kësaj pike, Pacolli ka vlerësuar kontributin e deritanishëm të shoqërisë civile mbi politikën e jashtme dhe në të gjitha fazat konsolidimit të shtetit të Kosovës, duke theksuar sipas tij, rëndësinë që do ta ketë përfshirja dhe angazhimi i tyre edhe në të ardhmen.

Duke folur mbi mbarëvajtjen dhe dinamikën e procesit të njohjeve, Pacolli ka theksuar se “Kosova brenda ekzistencës së saj dhjetë-vjeçare si shtet i Pavarur dhe Sovran ka bërë hapa të mëdhenj në këtë drejtim, duke rritur numrin e njohjeve në 117, por ka përmendur edhe sfidat, respektivisht ndryshimin e rrethanave në politikën ndërkombëtare dhe ballafaqimin me një fushatë gjithnjë e më agresive nga ana e Serbisë”. /Telegrafi/