Deputetja e Lëvizjes Vetëvendosje, Fitore Pacolli në një konferencë për media ka thënë se viti 2018 sa i përket politikës së jashtme të Kosovës ka kaluar me shumë probleme dhe e ka dërguar shtetin në regres.

Pacolli tha se Kosova ka kaluar një vit tepër të pazakontë në politikën e jashtme.

“Viti 2018 përbën një regres të plotë me një politikë të jashtme të çakorduar. Kanë thënë se do të kemi njohje nga Serbia, anëtarësim në Interpol e në organizata tjera dhe njohje nga shtete të ndryshme etj”, ka thënë ajo

Pacolli u shpreh se Qeveria Haradinaj ka dështuar në politikën e jashtme.

“…U munduam dje të kuptojmë më shumë nga ministri Pacolli për tërheqjen e njohjeve, por ministri e mohoi një gjë të tillë. Ndërsa, zëvendëskryeministri Hoxhaj e konfirmoi një gjë të tillë përmes deklaratave publike. Ministri ka marr 40 vendime pa informuar deputetet e Komisionit të Jashtëm”, ka thënë Pacolli.

Deputetja e VV-së theksoi se paraqitja e djeshme e ministrit për Punë të Jashtme, Behxhet Pacolli ishte skandaloze.

“Ministri u mundonte në mënyra të ndryshme të ikte nga përgjegjësia. Arsyetimi i tij ishte banal. Njëra ndër arsyet ishte se e fyenin, e unë nuk e di kush e paska fyer atë”, tha ai.

Pacolli ka folur edhe për procesin e integrimit evropian.  “Vetëm 13 për qind të prioriteteve të MSA-së janë përmbushur. E vetëm katër prej 22 prioriteteve për reforma janë përmbushur. Kjo qeveri ka dështuar edhe me liberalizimin e vizave. Asnjëherë populli i Kosovës nuk është informuar saktë. Kryeministri po bëhet qesharak, ku ende po premton në këtë fund vit, kur edhe institucionet e BE-së shkojnë në pushime. Në BE nuk ka pajtim në mes të shteteve anëtare nëse Kosova i ka plotësuar kriteret për liberalizmin e vizave”, ka thënë Pacolli.

Ajo po ashtu tha se në Kosovë nuk ka unitet në mes të partive politike, e mesazhi i Trumpit sipas saj ishte qartë duke kërkuar unitet në vend.

“Presidenti Trump e ka konfirmuar se duhet një unitet në vend e ne nuk e kemi një unitet. E kemi presidentin Thaçi që e ka marr dialogun si të vetin dhe një delegacion që po i shërbejnë Thaçit si shërbëtorë”, tha Pacolli. /Telegrafi/