Orban: Hungaria refuzon të ndajë fonde për Ukrainën derisa të thonë se ku shkuan 70 miliardë euro

Viktor Orbán tha se Hungaria kundërshton planet e Komisionit Evropian për t’i dhënë më shumë para Ukrainës, dhe nuk është e gatshme të sigurojë para shtesë për të financuar kostot e rritura të shërbimit të borxhit të BE-së.

“Një gjë është e qartë, ne hungarezët nuk do t’i japim më shumë para Ukrainës derisa të thonë se ku shkuan 70 miliardë eurot e mëparshme”, tha kryeministri hungarez, transmeton Telegrafi.

Ai tha se e konsideron jashtëzakonisht qesharake dhe absurde që të ndahen më shumë para për të financuar shpenzimet e shërbimit të një kredie borxhi, nga e cila Hungaria ende nuk i ka marrë mjetet që i takojnë.

Orban foli në margjinat e samitit të BE-së në Bruksel. Budapesti, së bashku me Poloninë, nuk morën fonde nga fondi i rimëkëmbjes së BE-së, në mes të një mosmarrëveshjeje mbi sundimin e ligjit.

Lexo po ashtu Kreu i inteligjencës ushtarake ukrainase, FSB-ja ruse është urdhëruar të vrasë Yevgeny Prigozhinin

Reuters raporton se liderët e BE-së thanë se do të merrnin angazhime afatgjata për të forcuar sigurinë e Ukrainës, pasi presidenti ukrainas Volodymyr Zelensky u kërkoi atyre të fillojnë punën për një raund të ri sanksionesh kundër Rusisë.

Orban tha se nuk ka pothuajse asnjë shans që vendet anëtare të BE-së t’i miratojnë këto plane financiare dhe se do të fillojë një “luftë e gjatë”.

Hungaria gjithashtu, së bashku me Poloninë, bllokuan miratimin e një përfundimi për migracionin në samitin e BE-së. /Telegrafi/