“Ora po troket” për Rusinë: Gjermania vjen me ultimatum për Putinin

Presidenti rus Vladimir Putin duhet t’i përgjigjet propozimit për armëpushim në Ukrainë deri në fund të ditës.

Sipas zëdhënësit të qeverisë gjermane Stefan Kornelius, “ora po troket” për Rusinë.

Dhe nëse Moska nuk e pranon kërkesën, do të fillojnë “përgatitjet” për sanksione të reja.

“Nëse Rusia nuk e pranon armëpushimin para fundit të ditës, evropianët do të fillojnë të përgatisin sanksione”, ka thënë Kornelius, shkruan The Guardian, përcjell Telegrafi.

Deklarata e tij vjen pasi udhëheqësit evropianë kërkuan gjatë një vizite fundjave në Kiev që Rusia të binte dakord për armëpushimin.

Aktualisht, Uashingtoni po propozon një armëpushim 30-ditor në vijën e frontit midis Kievit dhe Moskës.

Ndërkohë, presidenti rus Vladimir Putin po paraqet kundërkërkesa: ndalimin e mobilizimit në Ukrainë dhe ndalimin e dërgesave të armëve nga vendet perëndimore.

Gjatë samitit në Kiev më 10 maj, udhëheqësit e vendeve në “Koalicionin e të Vullnetshmëve” caktuan një afat që Rusia të bjerë dakord me armëpushimin 30-ditor.

Siç është thënë më tej, nëse Moska refuzon, përballet me një paketë të re sanksionesh ndërkombëtare.

Natën e 11 majit, Putin e hodhi poshtë propozimin për armëpushim dhe në vend të kësaj sugjeroi rifillimin e negociatave të drejtpërdrejta me Ukrainën dhe mbajtjen e një takimi më 15 maj në Stamboll.

Të nesërmen, presidenti Volodymyr Zelensky deklaroi se Ukraina është gati për dialog, por theksoi se një armëpushim i konfirmuar, i planifikuar të fillojë më 12 maj, është një kusht i domosdoshëm.

Më vonë, Turqia deklaroi zyrtarisht gatishmërinë e saj për të ndërmjetësuar midis Ukrainës dhe Rusisë. /Telegrafi/