Të gjithë janë krenar me Milot Rashicën e Florent Hasanin, me Kosovën dhe fitoret e saj, vrapojnë për foto dhe shkrime të bukura në rrjetet sociale, por në terren realiteti është krejt ndryshe.

Futbolli i Kosovës ka kohë që i ka dy fytyra, atë të ekipit A të Kosovës dhe atë të kampionatit vendor, klubeve.

Shumë pak investime, apo thënë ndryshe investime të lënë në gjysmë, qytet të mëdha që kanë nga një, maksimum dy fusha dhe pjesa tjetër, gërmadha të trashëguara.

E tillë është gjendje edhe e stadiumit ‘Ferki Aliu’ të Vushtrrisë, stadium që e ka prodhuar Milot Rashicën, që sot të gjithë krenohemi me të.

Aty e ka nisur edhe Florent Hasani, që pret debutimin me ekipin A, pasi shumë shpesh është tubuar.

Aty kanë luajtur edhe Vedat Muriqi e Amir Rrahmani, si mysafirë më klubet e tyre Liria dhe Drenica, sa ishin pjesë e Superligës së Kosovës, shkruan Telegrafi.

Stadiumi “Ferki Aliu” në Vushtrri është lënë në harresë sikurse nga institucionet komunale, po ashtu edhe nga ato qendrore.

Në 20 vitet pas luftës ka filluar të nderohet vetëm tribuna perëndimore edhe atë është lënë në gjysmë. Klubi ka reaguar duke postuar edhe foto nga gjendja e këtij stadiumi, shkruan Telegrafi.

“I dhamë Kosovës shumë talenta ndër vite, rasti i fundit me Milot Rashicen e Florent Hasanin ku të gjithë po ndihemi krenar me këta djelmosha!”.

“Ndërsa 20 vjet pas luftës, i vetmi investim në stadiumin e qytetit ka qene tribuna perëndimore (ndërtim i vrazhdë), e cila në plan projekt ka qene e paraparë të ndërtohen edhe zhveshtoret e reja, projekt që mbeti vetëm në letër”.

“Shikojeni gjendjen e mjerueshme të stadiumit ‘Ferki Aliu’ në Vushtrri”, thuhet në reagimin e klubit.

Në fakt i gjithë projekti është lënë në letër, ani pse ishte paraparë për tu ndërtuar zhveshtoret e reja, pasi këto aktualet, realisht duken sikurse të një klubi që e ka braktisur shumë moti atë stadium.

Ky qytet dhe shumë qytete tjera presin investime në fusha e stadiume, pasi në çdo lagje mund të jetë një Milot Rashicë.

Klubi që këtë sezon luan në Superligë, ka postuar foto nga gjendja aktuale e stadiumit, që për shumë kë nuk do koment.

Për shumë politikan që vrapojnë të fotografohen, më mirë do të ishte të punohet, të punohet aty nga ku vjen suksesi. /Telegrafi/