Napoli ka refuzuar ofertën e parë të Fenerbahçes për Romelu Lukakun, ndërsa e ardhmja e sulmuesit belg në Itali duket gjithnjë e më e pasigurt.
Sipas raportimeve të fundit nga Italia, Fenerbahce dhe Napoli janë ende në negociata për transferimin e Lukakut dhe palët vazhdojnë të besojnë se mund të arrijnë një marrëveshje gjatë ditëve të ardhshme.
Lukaku është në vitin e fundit të kontratës së tij me Napolin, e cila skadon në verën e vitit 2027. Për këtë arsye, klubi italian është i gatshëm të shqyrtojë oferta për sulmuesin gjatë kësaj vere.
Raportimet në Itali bëjnë të ditur se Napoli kërkon rreth 10 milionë euro për kartonin e 33-vjeçarit. Ndërkohë, edhe vetë Lukaku raportohet se kërkon një pagë prej rreth 10 milionë eurosh në sezon, një kërkesë që mund ta komplikojë më tej transferimin te klubi turk.
Fenerbahce kishte bërë ofertën e parë të dielën, e cila besohet se ishte në vlerën e rreth 5 milionë eurove. Megjithatë, sipas “Corriere dello Sport”, Napoli ka vendosur ta refuzojë këtë propozim, pasi e konsideron shumë të ulët krahasuar me vlerësimin e tij për sulmuesin belg.
Pavarësisht refuzimit të ofertës së parë, Fenerbahce pritet të rikthehet me një propozim të përmirësuar në përpjekje për ta bindur Napolin.
Palët vazhdojnë të jenë në kontakt dhe ekziston optimizëm se një marrëveshje mund të arrihet, por fillimisht duhet të gjendet një kompromis mes kërkesës së Napolit dhe ofertës së klubit turk./Telegrafi/
