LAJMI I FUNDIT:

Nagavci e quan të papërgjegjshme inicimin për rrëzimin e Qeverisë Kurti

Nagavci e quan të papërgjegjshme inicimin për rrëzimin e Qeverisë Kurti

Nënkryetarja e Kuvendit të Kosovës nga radhët e Vetëvendosjes, Arberie Nagavci e ka quajtur papërgjegjësi të madhe dhe jo humane inicimin e mocionit të votëbesimit nga ana e LDK-së për rrëzimin e Qeverisë Kurti, në kohën nëpër të cilën po kalon vendi për shkak të coronavirusit.

Seanca e jashtëzakonshme, sipas Nagavcit është e vështirë që të mbahet për shkak të rekomandimeve të IKSHP-së, për të mbajtur distancë deri në dy metra si masë parandaluese kundër përhapjes së coronavirusit.

“Mund të ketë më shumë persona që mund të kenë tashmë virusin korona. Ata 200 persona që punojnë në Kuvend, do të kenë kontakte me anëtarët e familjeve të tyre dhe është shumë papërgjegjësi të mbahet një seancë e tillë”, u shpreh Nagavci duke treguar për rrezikun nga mundësia e përhapjes së coronavirusit në radhët e punonjësve të Kuvendit, përfshirë edhe deputetët që do të merrnin pjesë në seancë.

Ajo ka thënë se është e rëndësishme në këto ditë që të ketë një fokusim në shëndetin publik se sa të kërkohet që vendi të mbetet pa qeveri.

“Qeveria është në shërbim të qytetarëve, duke u munduar të menaxhojnë situatën në vend”, tha Nagavci për televizionin publik.