Moska kërcënon me armë bërthamore nëse Ukrainës i lejohen sulmet me armë perëndimore thellë brenda Rusisë

Moska ka kërcënuar se Kievi do të kthehet në “një pikë të shkrirë” nëse aleatët ia lejojnë Ukrainës të përdorë raketat perëndimore me rreze të gjatë veprimi për të goditur objektiva thellë brenda Rusisë.

Kërcënimi nga Dmitry Medvedev, nënkryetar i Këshillit të Sigurimit të Rusisë, erdhi ndërsa SHBA-ja dhe Britania e Madhe po diskutojnë t’i japin Kievit lejen për të përdorur armë perëndimore për të sulmuar objektivat strategjikë më larg në territorin rus.

Medvedev tha se Kremlini tashmë ka baza “formale” për të përdorur armë bërthamore pas inkursionit ndërkufitar të Ukrainës në rajonin e Kurskut të Rusisë, por në vend të kësaj mund të përdorë teknologji më të reja për të krijuar një “pikë gjigante të shkrirë” në kryeqytetin ukrainas, shkruan Politico, përcjell Telegrafi.

“Moska ka treguar durim”, tha Medvedev.

“Megjithatë, ata nuk duan të pranojnë një gjë: çdo durimi i vjen fundi”, shtoi ai.

Në të njëjtën kohë, Medvedev tha se “një konflikt bërthamor me të vërtetë nuk i nevojitet askujt”, duke shtuar se: “Është e qartë se një përgjigje bërthamore është një vendim jashtëzakonisht i vështirë me pasoja të pakthyeshme”.

Siç raportohet, kryeministri i Mbretërisë së Bashkuar Keir Starmer dhe presidenti i SHBA-së Joe Biden, në një takim në Uashington diskutuan mbi përdorimin e mundshëm të Ukrainës të raketave të lundrimit Storm Shadow të prodhimit britanik në tokën ruse, pa shpallur ndonjë vendim.

Përpara këtij takimi, presidenti rus Vladimir Putin tha se dhënia e një leje të tillë në Kiev do t’i vinte vendet e NATO-s “në luftë me Rusinë.”

Biden e hodhi poshtë kërcënimin, duke u thënë gazetarëve: “Unë nuk mendoj shumë për Vladimir Putinin”.

Ndërkohë, presidenti ukrainas Volodymyr Zelensky përsëriti lutjet e Kievit për përdorim të zgjeruar të armëve perëndimore.

“Ne po bëjmë përparim në fushën e betejës. Por, ne kemi nevojë për leje për të përdorur armë me rreze të gjatë”, tha Zelensky.

“Shpresoj që komuniteti politik amerikan ta kuptojë këtë qartë dhe se do të merret vendimi përkatës”, shtoi ai.

Megjithatë, edhe pas takimit mes dy liderëve, Starmer tha se ende nuk është marrë asnjë vendim përfundimtar.

Ai sugjeroi se zhvillime të mëtejshme mund të pasojnë në mbledhjen e Asamblesë së Përgjithshme të OKB-së më vonë këtë muaj. /Telegrafi/