Miratimi i buxhetit, Kongresi amerikan përballë sfidës për të shmangur mbylljen e pjesshme të qeverisë

Demokratët në Kongresin amerikan kanë kërkuar veprime të shpejta për të financuar programe qeveritare për të shmangur një mbyllje të pjesshme të saj për mungesën e buxhetit. Por fillimisht atyre u duhej një sinjal gatishmërie nga republikanët për të negociuar.

Fondet qeveritare për financimin e programeve të përditshme përfundojnë më 18 shkurt. Dështimi për të siguruar një marrëveshje mund të shkaktojë një mbyllje të pjesshme të qeverisë. Bllokimi mund të ketë ndikim në operacionet ushtarake dhe diplomatike, transportin ajror, parqet kombëtare, disa programe të kujdesit shëndetësor si dhe aktivitete të tjera.

Kur kanë mbetur pak më shumë se dy javë deri në fund të afatit, Kongresi mund të detyrohet të miratojë masa plotësuese për financimin e programeve ndërsa vazhdojnë negociatat. Dy masa të tilla u miratuan vitin e kaluar, duke i mbajtur shpenzimet në përputhje me nivelet gjatë presidencës së republikanit Donald Trump.

Për herë të fundit qeveria u mbyll pjesërisht nga 22 dhjetori i vitit 2018 deri më 25 janar 2019, një numër ditësh rekord, ndërsa Trump u përball me Kongresin lidhur me sigurimin e fondeve për ndërtimin e murit kufitar me Meksikën.

Arritja e një marrëveshje për buxhetin, para skadimit të afatit, do të nënkuptonte një çështje më pak për Presidentin Joe Binden ndërsa përpiqet të sigurojë mbështetjen e nevojshme në Senat për miratimin e një anëtari të ri në Gjykatën e Lartë dhe ringjalljen e paketës së tij për investimet në infrastrukturë.

Projektpropozim demokrat për një buxhet me mbi 1,5 trilion dollarë shpenzime, që tashmë u është ofruar republikanëve, shënon një rritje mbi 8% krahasuar vitin e kaluar fiskal.

“Po presim kundërofertën republikane”, tha për gazetarët udhëheqësi i shumicës demokrate në Senat, Chuck Schumer.

Projektligjet e miratuara verën e kaluar nga Dhoma e Përfaqësuesve do të siguronin 755 miliardë dollarë për ushtrinë dhe 768 miliardë dollarë për programet jo-mbrojtëse. Këtu nuk përfshihen programet e detyrueshme si fondi i pensioneve dhe kujdesi shëndetësor për të moshuarit, të varfrit dhe invalidët.

Por nga ana tjetër, republikanët kërkojnë shpenzime të balancuara mes programeve të mbrojtjes dhe atyre civile. /VoA/