Menaxheri i Përfaqësues së Kosovës kritikon ashpër Uran Bislimin për sjelljen e tij ndaj ftesës

Menaxheri i Përfaqësues së Kosovës, Bajram Shala ka folur për Uran Bislimin dhe Mërgim Berishën, që kanë bërë një veprim të pahijshëm sa i përketë ftesës.

Në konferencën për media, Shala bëri të ditur se Bislimi nuk ka pasur guxim ta refuzojë ekipin direkt, por e ka refuzuar nëpërmjet klubit.

“Uran Bislmi e ka refuzuar Kosovën tri herë radhazi, madje nuk ka pasur guxim që ta bëjë këtë drejtpërdrejt, por e ka bërë përmes klubit”, ka thënë menaxheri i Përfaqësues, Bajram Shala.

“Ai ka luajtur me fanellën e Kosovës, e ka puthur atë, por që ai deri në fund ishte për po, ndërsa më pas refuzoi të vinte”.

“Në nëntor erdhi, ndërsa tash na refuzoi përmes klubit të tij, nuk kishte as guxim e as respekt për të na kumtuar lajmin e refuzimit. Ne ia kishim siguruar edhe biletën e udhëtimit. Por, klubi i tij na tha se lojtari nuk dëshiron ta djeg mundësinë për ta përfaqësuar vendin tjetër tek i cili ka nënshtetësi, Zvicrën. Por, nëse ai e ka këtë dilemë, mund të luajë për Zvicrën pasi Kosova më nuk është opsion për Bislimin”.

“Sa i përket Mërgim Berishës, kjo histori datën që katër vite, ai e shikonte Kosovën si opsion i fundit, duke bërë presion ndaj Gjermanisë ta fitojë”.

“Situatë e njëjtë është edhe për Bislimin, që e ka parë Kosovën si opsion të dytë dhe nuk ka pasur guxim të vije”.

“Ai (Bislimi) i ka dyshtetësi dhe nuk e ka të qartë se ku dëshiron të luajë edhe pse ne patëm mirëkuptim. Ai erdhi në nëntor, luajti dy ndeshje, ka shënuar gol dhe e ka puthur stemën.”.

“Më vonë ai ia ka gjuajtur fajin Luganos se ata nuk e kanë lënë të luajë për Kosovën, ndërsa klubi e ka kthyer përgjigjen se ai ende nuk ka vendosur se për kë të luajë”, ka shtuar më tej Bajrami. /Telegrafi/