Me titujt “Rusët në Kyiv… ukrainasit kërkojnë mëshirë”, “Zelensky është në prag të kapitullimit” dhe “Neonazistët ukrainas rrëmbyen 100 kamionistë serbë”, janë disa nga titujt që mediet pro-qeveritare në Serbi propagandojnë rreth agresionit ushtarak rusë në Ukrainë.

Sipas stilit të propagandës së Kremlinit, këto medie vazhdojnë të dezinformojnë lidhur më gjendjen në Ukrainë.

Lidhur me këtë, analisti boshnjak Jasmin Mujanoviq ka reaguar duke shkruar në Twitter se mediet e regjimit në Serbi janë në rënie.

“Derisa mediet ndërkombëtare raportojnë për pushtimin rus në Ukrainë dhe krimet e tyre të luftës kundër popullatës civile, në regjimin e Serbisë tabloidet janë në rënie. ‘Rusët në Kyiv… ukrainasit kërkojnë mëshirë’, thotë Informer, ‘Zelensky është në prag të kapitullimit’, pohon Objektiv”, shkruan Mujanoviq, përcjell Telegrafi.

Ndërsa, për ish-ministrin e Punëve të Jashtme të Kosovës, Petrit Selimi mediet e kontrolluara nga Qeverisë vazhdojnë dezinformimin pro-rus.

“Mediet e kontrolluara nga qeveria e Serbisë vazhdojnë dezinformimin pro-rus. ‘Putin nuk heq dorë asnjë centimetër, lufta përfundon kur Ukraina të heqë dorë NATO’, ‘Neonazistët ukrainas rrëmbyen 100 kamionistë serbë”, “Serbia kërcënohet me Maidan nga Carl Bildt, Januzs Bugajski dhe të tjerët”, ka reaguar Selimi. /Telegrafi/