Një muaj më parë, Egzon Binaku duhej të kishte veshur fanellën kuqezi dhe të bënte debutimin e tij me Shqipërinë.

Por një dëmtim pengoi mbrojtësin e majtë i cili ka vendosur të braktisë përfaqësuesen e Suedisë për fanellën kuqezi.

Megjithatë, ai nuk do të mungojë në ndeshjen e sotme në Mitrovicë, ku Drita do të luajë kundër klubit të tij, Malmo.

Kjo do të jetë një ndeshje e veçantë për lojtarin, pasi pjesë e familjes së tij është nga Mitrovica.

“Familja e mamasë time është nga atje, mendoj se shumë do të më ndjekin në stadium. Do të jetë shumë argëtuese. Do të vijën shumë familjarë, mendoj se do të më mbështetin mua”, tha ai për mediat suedeze.

“Jashtë futbollit e njoh Mitrovicën, por nuk di gjë sa i përket futbollit, si do të jetë në tribuna. Kanë kaluar 5 vite që kur kam qenë atje herën e fundit. Është qartësisht një shtet më i varfër, por ka klimë të mirë dhe është një vend i bukur. Padyshim që edhe atje ka qytete më pak të mira, ku ka të varfër, por kështu është kudo”.

“Nuk është se kam folur shumë me familjarët për ndeshjen me Dritën, por do të jetë shumë argëtuese të ndeshemi me ta. Ne do t’i sulmojmë që në fillim, nuk do të jetë shëtitje, mendoj se do të kalojmë raundin e parë, do të shkojmë atje dhe të fitojmë”, tha mbrojtësi i përfaqësueses shqiptare. /vipsport.al/