Mbani mizat larg gjatë verës me këtë përzierje të thjeshtë shtëpiake

Nuk ka asgjë më të bezdisshme sesa të hapësh një dritare për ajër të pastër dhe menjëherë të hyjë një mizë që fillon të fluturojë përreth. Por ka një mënyrë shumë të thjeshtë për t’i mbajtur mizat larg nga shtëpia.

Shumica e ‘sprejve’ kundër mizave që shiten nëpër dyqane përmbajnë kimikate të rrezikshme që ndotin ajrin në shtëpi dhe mund të jenë të dëmshme për shëndetin. Prandaj, është më mirë të përdorim një alternativë natyrale.

Andre Kazimierski, një ekspert pastrimi nga “Sophia’s Cleaning”, thotë se mund të largoni lehtësisht mizat pa përdorur kimikate, nëse keni spec djegës (cayenne pepper) në kuzhinë. Ai shpjegon:

“Përziej një lugë gjelle spec djegës me dy gota ujë të nxehtë për të krijuar një sprej të thjeshtë që largon mizat”.

Mund të duket e çuditshme, por mizat mbështeten shumë te nuhatja për të gjetur ushqim dhe për të lëvizur.

Speci djegës përmban një substancë me erë të fortë dhe djegëse që irriton shumë nuhatjen e mizave.

Jo vetëm që i bezdis, por kjo erë e fortë maskon edhe aromën e ushqimit që zakonisht i tërheq ato në shtëpi – kështu që ato nuk kanë arsye të qëndrojnë.

Si të bëni ‘sprejin’ natyral kundër mizave:

Zieni rreth 475 ml ujë (rreth dy gota);

Hidheni ujin në një tas dhe shtoni 1 ose 2 lugë gjelle spec djegës pluhur;

Përziejeni mirë dhe lëreni të ftohet plotësisht;

Pastaj hidheni në një shishe ‘spreji bosh’ (mund t’i gjeni lehtësisht në dyqanet e pastrimit, markete, apo dyqane të vegjël);

Spërkateni përzierjen rreth dritareve, dyerve, kuzhinës dhe vendeve ku shfaqen zakonisht mizat.

Mizat do të qëndrojnë larg për shkak të erës së fortë dhe djegëse të ‘sprejit’.

Kujdes nëse keni kafshë shtëpiake!

Speci djegës mund të shpërndahet në ajër dhe të shkaktojë djegie ose shqetësim në sytë e maceve dhe qenve. Në këtë rast, mos e përdorni këtë metodë.