Mancini: Spinazzola ishte mbrojtësi më i mirë në Euro 2020, ndaj Anglisë do të jetë ndeshje e bukur

Italia ka arritur në finalen e madhe të Kampionatit Evropian, Euro 2020.

Por keqardhja më e madhe për trajnerin e Azzurëve, Roberto Mancini është që mbrojtësi Leonardo Spinazzola nuk mund të luaj.

Mbrojtësi i majtë i Romës u lëndua në duel me Belgjikën në çerekfinale të Euro 2020, ku do të mbetet jashtë fushave për rreth gjashtë muaj.

E numri një i Kombëtares së Italisë, Roberto Mancini ka thënë se mbrojtësi i Romës ka qenë më i miri në Euro 2020.

Tekniku italian ndjen keqardhje që Spinazzola nuk do të mund të luaj në finale ndaj Anglisë.

“Një keqardhje e madhe që Spinazzola nuk mund të luajë në finale, por është fakt se ishte mbrojtësi më i mirë në Kampionatin Evropian”, tha Mancini.

Tutje italiani ka folur edhe për përballjen me Anglinë, ku ka deklaruar se do të jetë një ndeshje e bukur.

“Do të jetë një ndeshje e bukur, ato janë solide dhe kanë arritur deri këtu me meritë”, deklaroi Mancini.

“Unë gjithmonë kam menduar se mund të shkoj në fund, sepse gjithmonë besoj në gjëra pozitive, por mbi të gjitha djemtë besuan që nga momenti i parë, pasi nuk ishte e thjeshtë”, u shpreh tekniku italian.

Finalja e madhe mes Italisë dhe Anglisë do të zhvillohet të dielën me fillim nga ora 21:00 në Wembley. /Telegrafi/