Përdorimi i telefonit gjatë ngasjes së automjetit, gjobat shkojnë deri në 500 euro si dhe tri pikë negative

Policia e Kosovës ka njoftuar se qytetarët që do të kapen duke përdorur telefonin mobil gjatë kalimit të rrugës si këmbësorë, duke përfshirë edhe ata që kanë vënë dëgjueset, do të përballen me një gjobë prej 50 eurosh.

Në fokus të kësaj masë janë edhe përdoruesit e pajisjeve të ngjashme që mund të shkaktojnë hutim gjatë kalimit të rrugës, shiritit të biçikletave apo të binarëve.

Ky vendim vjen pas hyrjes në fuqi të Ligjit të ri për Rregullat e Trafikut Rrugor më 03.04.2024, i cili sjell ashpërsim të masave ndëshkuese për shkelësit e rregullave të trafikut, sidomos për ato që përdorin telefonin ose pajisje të tjera gjatë drejtimit ose kalimit në trafik.

Ndërsa shoferët e mjeteve me veprim motorik do të përballen me sanksione të rënda nëse kapen duke mbajtur telefonin me dorë ose duke përdorur pajisje të tjera që pengojnë drejtimit të sigurt.

Lexo po ashtu Hyn në fuqi Ligji për trafikun në Kosovë, njihuni me gjobat e reja në trafik

Mosrespektimi i rregullave të reja do të sjellë si pasojë pikë negative dhe gjoba.

Nëse një shofer shkel këto rregulla për herë të parë, masat përfshijnë 1 pikë negative dhe një gjobë prej 100 euro.

Shkelja për herë të dytë rritet në 2 pikë negative, ndalesë dy-mujore në drejtim të mjetit, dhe një gjobë prej 200 euro.

Ndërsa, për herë të tretë, shkelësi përballët me 3 pikë negative, gjashtë muaj ndalim nga drejtimi i mjetit dhe një gjobë prej 500 euro.

Policia e Kosovës ka theksuar rëndësinë e respektimit të rregullave të reja për sigurinë e trafikut dhe paralajmëron se zbatimi i ligjit do të jetë i rreptë, në përpjekje për të ulur aksidentet dhe rritur sigurinë e qytetarëve në rrugë./Telegrafi/