Le Monde: Rikthehen diskutimet mbi dërgimin e trupave franceze dhe britanike në Ukrainë

Diskutimet për vendosjen e trupave perëndimore dhe kontraktorëve privatë të mbrojtjes në Ukrainë, kanë rifilluar në Evropë pas fitores së Donald Trump në zgjedhjet amerikane.

Debati është i ndjeshëm dhe i klasifikuar, por sipas të përditshmes franceze Le Monde, çështja e vendosjes së trupave tokësore në Ukrainë është vendosur sërish në agjendën e liderëve evropianë, transmeton Telegrafi.

Megjithëse presidenti francez Emmanuel Macron nxiti kundërshtime të forta kur e ngriti këtë çështje në shkurt, por duket se me kthimin e Donald Trump në pushtet në Shtetet e Bashkuara, diskutimi është rishfaqur.

Le Monde raporton se kjo temë është diskutuar më 11 nëntor gjatë vizitës së kryeministrit britanik Keir Starmer në Francë.

U theksua se as Londra dhe as Parisi, nuk e përjashtojnë mundësinë e udhëheqjes së një koalicioni për të mbështetur Ukrainën.

“Diskutimet janë duke u zhvilluar midis Britanisë së Madhe dhe Francës për bashkëpunimin në mbrojtje, duke përfshirë krijimin e një grupi kryesor të aleatëve evropianë të fokusuar në Ukrainë dhe sigurinë më të gjerë evropiane”, tha një burim ushtarak britanik për Le Monde.

Më 23 nëntor, Ministri i Jashtëm francez Jean-Noël Barrot konfirmoi gjithashtu mbështetjen e fortë dhe të vazhdueshme të Francës për Ukrainën në një intervistë me BBC.

I pyetur nëse mbështetja e Francës mund të shtrihet në vendosjen e trupave tokësore në Ukrainë, ai u përgjigj: “Ne nuk po përjashtojmë asnjë opsion”.

“Ne do të mbështesim Ukrainën aq intensivisht dhe për aq kohë sa të jetë e nevojshme. Pse? Sepse siguria jonë është në rrezik. Sa herë që ushtria ruse përparon me një kilometër katror, ​​kërcënimi shkon një hap më afër Evropës”, shtoi ai.

Megjithatë, Elie Tenenbaum, një studiues në Institutin francez të Marrëdhënieve Ndërkombëtare, i tha Le Monde se dërgimi i trupave tokësore mund të jetë teknikisht i realizueshëm në rast të një armëpushimi, me ushtarë evropianë të vendosur për të garantuar sigurinë në rajon.

Gjenerali holandez Rob Bauer, kryetar i Komitetit Ushtarak të NATO-s, deklaroi se nëse udhëheqësit perëndimorë nuk do të kufizoheshin nga rreziku i përdorimit të armëve bërthamore nga Rusia, ata do të kishin vendosur tashmë trupat e tyre për të ndihmuar Ukrainën në luftë. /Telegrafi/