Kush janë luftëtarët ukrainas ‘të bllokuar’ në fabrikën e çelikut në Mariupol?

Presidenti i Rusisë, Vladimir Putin ka urdhëruar trupat ruse të mos sulmojnë fabrikën e çelikut Azovstal, duke u thënë atyre të mbyllin zonën në mënyrë që edhe një “mizë” të mos mund të shpëtojë.

Sipas mediave të huaja, përcjell Telegrafi, bëhet fjalë për fabrikën masive që është bërë bastioni i fundit i rezistencës ukrainase në Mariupol.

Por kush janë luftëtarët e mbetur brenda?

Siç vë në pah BBC, Brigada e 36-të e Marinës është e izoluar në uzinë.

Të mërkurën, komandanti i saj, Maj Serhiy Volyna, tha se trupat e tij nuk do të dorëzoheshin, por ai u lut për ndihmë ndërkombëtare për 500 ushtarët e plagosur dhe qindra gra dhe fëmijë që ai tha se ishin fshehur me ta në fabrikën e çelikut.

Britanikët Aiden Aslin dhe Shaun Pinner, të cilët kishin mbrojtur Mariupolin dhe u kapën nga forcat ruse javën e kaluar, ishin anëtarë të brigadës.

Njësia tjetër në fabrikën e çelikut është Brigada Azov, e quajtur sipas Detit të Azov, i cili lidh Mariupolin me pjesën tjetër të Detit të Zi.

Azov është një milici e lidhur me nacionalistët e ekstremit të djathtë, e cila më vonë u përfshi në Gardën Kombëtare të Ukrainës. Numri i tyre është vlerësuar të jetë rreth 900.

Marinsat u bashkuan me Azov në Mariupol javën e kaluar.

Sidoqoftë, është e paqartë se sa trupa ukrainase kanë mbetur në uzinë, megjithëse ministri rus i Mbrojtjes, Sergei Shoigu tha se kishte më shumë se 2,000.

Sot në mëngjes Azov ka thënë se kishte shkatërruar tre tanke, dy automjete luftarake të këmbësorisë dhe një transportues të blinduar të personelit në ditët e fundit “pavarësisht situatës jashtëzakonisht të vështirë”. /Telegrafi/