Kurti: Menaxherët e ri të Kosovës të gjejnë frymëzim te Nazmi Mikullovci

Menaxherët e ri të Kosovës të gjejnë frymëzim të njëmend te Nazmi Mikullovci, i cili ka qenë gjatë gjithë jetës menaxher shumë i suksesshëm, jo me synimin e pasurimit të vetës, por atë të zhvillimit të shoqërisë dhe kombit. Kështu u tha në mbledhjen komemorative në nderim të veprës së Nazmi Mikullovcit, të organizuar nga Qeveria e Kosovës.

Kryeministri Albin Kurti tha se Nazmiu në kujtimet e takimeve me të por mbi të gjitha me punët dhe kontributet e tij si drejtues i nivelit të lartë, është i pazëvendësueshëm, derisa foli edhe arsyet se pse erdhi ai në Lëvizjen Vetëvendosje.

“Nazmi Mikullovci, një prej menaxherëve më të mirë që ka pasur Kosova, nuk e kishte problem të shoqërohej me ne të cilët ishim shumë më të rinj e me pak përvojë. Mbase ne nuk kishim fort çka t’i mësonim Nazmiut, por prej tij ne kemi mësuar shumë në Lëvizje e jashtë saj. Nuk është rastësishme që viti kur Nazmi Mikullovci anëtarësohet në Lëvizjen Vetëvendosje përputhet me vitin kur ne të lëvizjes e hartojmë programin për zhvillim ekonomik pra në vitin 2010. Nazmi Mikullovci sivjet bëhej 80 vjeç e megjithatë këtë deri në fund jetoi i angazhuar. Mbetemi me shpresë që menaxherët e ri të Kosovës të gjejnë frymëzim të njëmend te Nazmi Mikullovci i cili ka qenë gjatë gjithë jetës menaxher shumë i suksesshëm, jo me synimin e pasurimit të vetës, por atë të zhvillimit të shoqërisë dhe kombit“, tha ai.

Në emër të familjes, Mentor Mikullovci falënderoi të gjithë pjesëmarrësit, duke thënë se duan ta kujtojnë atë për të gjithë veprimtarinë që ka bërë.

“Nazmiu apo axha Nazmi siç e kanë thirr shumica na ka lënë të pikëlluar të gjithëve por ne duam ta kujtojmë atë për të gjithë veprimtarinë që ka bërë“, tha ai.

Kryesuesi i bordit të Trepçës, Bahri Hyseni tha se Nazmiu dallohej për virtytet e larta njerëzore.

“Kishte edhe diçka të veçantë që e karakterizonte atë, mbamendja e saktë edhe të detajeve më të vogla. Trepça për të ka qenë opsesion, një lidhje e pashkëputur, ëndrra, sfida, jeta dhe dhimbja e tij krenare. Ai edhe kur nuk ka qenë i angazhuar drejtpërdrejt në Trepçë, nuk ndalej së interesuari për zgjidhjen aktuale të Trepçës“, tha ai.

Për jetën dhe kontributin e Nazmi Mikullovcit foli edhe zëvendëskryesuesja e bordit të AKP-së, Suzana Dautaj-Surdolli

Nazmi Mikullovci ishte edhe vëlla me deputetin dhe aktorin e njohur Adem Mikullovci. /kp/