Kuçi: Po punojmë për të zhbllokuar xhirollogaritë e Telekomit

Ministri i Ekonomisë dhe Ambientit, Blerim Kuçi, tha se xhirollogaritë e Telekomit të Kosovës vazhdojnë të jenë të bllokuar nga kompania Dardafone.net për shkak të borxhit ndaj saj.

Kuçi tha se janë në një proces të arritjes së një marrëveshjeje me kompaninë për të bërë amortizimin e borxhit ndaj saj. Megjithatë, ai tha se nuk mund të bëjnë zgjidhje brenda afatit të vendosur nga Sindikata e Punëtorëve të Telekomit.

Këto komente ministri Kuçi i ka bërë në Komisionin për Ekonomi, Punësim, Tregti, Industri, Ndërmarrësi dhe Investime Strategjike.

“Momentalisht janë te bllokuara prej kompanisë Dardafone.net që e ka fituar kontekstin me Telekomin. Llogaritë i kemi të bllokuara. Jemi duke shikuar marrëveshjen për të bërë një plan, gjatë këtij procesi ka ndodhur prapë bllokimi i llogarive. Marrëveshja është kërkuar që të bëhet një plan i amortizimit të këtij borxhi”, tha ai.

Lexo po ashtu Pas bllokimit të xhirollogarive të Telekomit, Hoti: Do të ndërmarrim veprime të shpejta për ta stabilizuar gjendjen

Sa i përket afatit kohor të Sindikatës, e cila skadon pas 48 orëve, që të bëhet një zgjidhje për çështjen e Telekomit, Kuçi tha se nuk mund të bëhet brenda këtij afati kohor.

“Jam i bindur që nuk mundemi brenda dy ditë siç ka thënë sindikata, por jemi në bisedime. Jemi në proces të marrëveshjes të gjendet një zgjidhje afatgjate. Po mundohemi të bëjmë zgjidhje, por jo brenda dy dite”, u shpreh Kuçi.

Në këtë mbledhje të Komisionit është miratuar në parim edhe ndryshim plotësimi i ligjit për Këshillin Ekonomiko-Social, si dhe Projektligji për Inspektoratin e Punës. /KP/