Krasniqi, Selimit: Nuk ta përmenda emrin askund, nuk e kuptoj reagimin tënd

Debati mes anëtarëve të Lëvizjes së Vetëvendosjes dhe kryetarit të Këshillit Kombëtar të NISMË-s, Jakup Krasniqi ka vazhduar edhe sot.

Pas një kundërpërgjigje që deputeti i VV-së, Rexhep Selimi i ktheu Krasniqit në një debat që ai kishte me sekretarin organizativ të Vetëvendosjes, Dardan Molliqaj, sot Krasniqi iu përgjigj Selimit duke i thënë se nuk ia ka përmendur emrin Selimit askund dhe nuk është dashur të reagojë.

Krasniqi kishte thënë se në seancën e 19 prillit, 2013, kur deputetët e VV-së ia kishin marrë mikrofonin Krasniqit që në atë kohë ishte kryetar Kuvendi, dikush nga deputetët e VV-së, kishte kërkuar nga ai lejimin e policisë brenda, pasi sipas tij, Vetëvendosja nuk dinte si të nxirrej nga ajo situatë konfliktuoze në të cilën ishte futur.

Selimi, mbrëmë i tha Krasniqit se ai duhet të tregojë se kush është ai deputet që pretendon Krasniqi.

Ndërsa, kjo është përgjigja e Krasniqit drejtuar deputetit Selimi sot:

I nderuari Rexhep,

Emrin tuaj nuk e kam përmendur askund publikisht. Unë nuk po mund ta kuptoj pse reagove ti në vend që të reagonte VV-ja?

Rexhë, përmes letrës publike me pyete, pse e kam dëgjuar deputetin e VV-së dhe nuk e paskam pyetur kryetarin e atëhershëm të VV-së?

Tani po të pyes unë, ty, pse nuk po e respekton hierarkinë, lidhur më ketë, pra kryetarin e atëhershëm Albin Kurtit dhe shefin e atëhershëm të grupit , Visar Ymerit, por po reagon ti?

Krejt çka kam të them në ketë rast është kjo:

Po kërkoj nga deputeti i VV-së që në ditën kur u diskutua në Kuvend marrëveshja e 19 prillit 2013, ta merr guximin qytetar, guximin njerëzor, mos të frikësohet për të thënë të vërtetën e kërkesës së tij për të ndërhyrë policia!

Deputeti duhet ta dinë, integriteti i njeriut tregohet të ditë të vështira!

Nëse deputeti i VV-së nuk ka guxim ta thotë të vërtetën, le të tregoi nga kush po frikësohet?! A mund të bashkëjetohet me partinë që nuk të beson dhe i frikësohesh! Nuk di, si mund t’u besohet atyre njerëzve që nuk kanë guxim ta thonë të vërtetën, se vendit e popullit do t’ua kthejnë ndryshimin e perspektiven?

Unë po frikësohem për friken e deputetit për ta pranuar të vërtetën e vetë?!

Deputet, mos qofsha në lëkurën tende! Pse po e fsheh një të vërtetë të dal në shesh?

Megjithatë unë e thash një të vërtetën time!”.