LAJMI I FUNDIT:

Konfiskohen pajisje për prodhimin e kriptovalutave gjatë një aksioni në Leposaviq

Konfiskohen pajisje për prodhimin e kriptovalutave gjatë një aksioni në Leposaviq

Njësitet kundër kontrabandës nga Dogana e Kosovës dhe Njësitet relevante nga Policia e Kosovës, këtë të shtunë kanë zhvilluar aksion të përbashkët në Leshak të Leposaviqit.

Me këtë rast, nga ky aksion, në një lokal afarist njësitet kanë konfiskuar si mallra të kontrabanduara 93 kartela grafike, tetë pajisje Antiminer, 17 pllaka elektronike që shërbejnë për prodhimin e kriptovalutave si dhe 280 litra pije alkoolike e 96 litra pije joalkoolike.

Lajmin e ka bërë të ditur ministri i Punëve të Brendshme, Xhelal Sveçla, përmes një postimi në Facebook.

Ai ka thënë gjithashtu se gjatë zhvillimit të këtij aktiviteti, është hasur edhe një automjet i dyshuar të cilit i janë konfiskuar produkte ushqimore që po i kontrabandonte nga Serbia.

“Falënderoj Doganën dhe Policinë e Kosovës për suksesin e sotëm por edhe për vendosmërinë e tyre për të luftuar çdo fenomen që cenon rendin dhe ligjet e Republikës së Kosovës”, ka shkruar Sveçla në Facebook. /Telegrafi/