Konfirmon ministri Lekaj: Segmenti i rrugës Zahaq – Pejë kryhet më 1 nëntor

Ministri i Infrastrukturës, Pal Lekaj, ka bërë të ditur se projekti i zgjerimit dhe asfaltimit të segmentit rrugor Zahaq – Pejë do të finalizohet në tërësi deri më 1 nëntor të këtij viti.

Duke folur në emisionin ‘Alo Mirëmëngjesi’ të Radio Dukagjinit, ministri Lekaj ka bërë të ditur se shqetësimet e qytetarëve të kësaj ane do të marrin fund më datën 1 nëntor sa i përket segmentit Zahaq – Pejë, pjesë e autostradës Prishtinë-Pejë. Përderisa është çështje muajsh përfundimi në tërësi i autostradës nga Kijeva deri në Pejë.

Lekaj ka thënë se sa i përket këtij segmenti, pra nga Zahaqi deri në Pejë, janë duke treguar kujdes në vendosjen e rreth-rrotullimeve duke tentuar që të bëjnë zgjidhje për ndërlidhjen me autoudhë të gjitha fshatrave që mund të cenohen, përfshirë Zahaqin, Ramunin dhe të tjerat.

“Unë kam kënaqësi t’ju informoj se më 1 nëntor do të merr fund në tërësi segmenti rrugor Zahaq-Pejë, deri në qytet. Pra në tërësi do të kryhet ky muhabet. Qeveritë e shkuara nga Peja I kanë rënë me nga një kilometër në vit, tash është ndryshe. Për këto punë ka vëmendje dhe interesim të drejtpërdrejt edhe nga kryeministri Haradinaj. Ne jemi në kontakt me komunitetin dhe jemi në përmbyllje të çështjeve që kanë të bëjnë me rreth-rrotullimet meqë, nuk duam që të atakohet asnjë fshat që ndërlidhet me qasjen në këtë pjesë të autoudhës, Ramun Zahaq e të gjitha”, deklaroi Lekaj.