Një legjendë e basketbollit nuk do të mund ta shohim në kampionatin botëror që do të mbahet në shtetin kinez.

Pau Gasol nuk do të veshë fanellën e kombëtares spanjolle, me të cilën ishte shpallur kampion bote në vitin 2006.

Në fakt, Gasol (2.13 m), i cili do të jetë 39 vjeç më 6 korrik, të enjten e kaluar operoi këmbën pas një lëndimi të marrë javë më parë.

Këtë e ka konfirmuar trajneri i “Furisë së Kuqe” duke thënë se do të ndihet mungesa e shtatgjatit të Milwaukee Bucks.

“Humbja e Gasolit është një goditje e madhe sepse është një lojtar që tashmë ka një vend në historinë tonë, madje edhe më shumë”, tha Scariolo, i cili gjithashtu shërben si asistent trajneri në Toronto Raptors.

Ndryshe, botërori i basketbollit do të mbahet nga 31 gushti deri më 15 shtator. /Telegrafi/