Në kuadër të vizitës zyrtare, shefja e Operacioneve Aktuale të Divizionit Operativ të Shtabit të Përgjithshëm të NATO-s, Ariella Viehe, u prit sot në takim nga komandanti i FSK-së, gjeneral major Bashkim Jashari.

Gjatë takimit, Ariella Viehe u shoqërua edhe nga drejtori i Ekipit Këshillues dhe Ndërlidhës të NATO-s (NALT), gjeneral brigade Jörg Rüter.

Me këtë rast, gjeneral Jashari shprehu mirënjohjen e thellë për kontributin e Ekipit të NALT-it në të gjitha të arriturat e deritashme të FSK-së, duke theksuar se bashkëpunimi reciprok do të avancohet edhe më tej.

Gjeneral Jashari e njoftoi Viehe me vizionin e tij për zhvillimin dhe avancimin e FSK-së, nga pozita e komandantit të ri të FSK-së, duke vënë në fokus , arritjen e aftësive dhe kapaciteteve operacionale të ndërveprueshme me forcat e vendeve anëtare të NATO-s.

Ai gjithashtu shprehu vullnetin e tij që Kosova nga vend konsumues i sigurisë të i mundësohet ofrimi i kontributit në operacione të përbashkëta me vendet anëtare dhe partnere të NATO-s, për çka është dëshmuar dhe po dëshmohet suksesshëm edhe në mbështetjen në operacionin aktual humanitar të NATO-s për evakuimin e refugjatëve afgan.

Ndërsa, Viehe theksoi se përvoja e gjatë e gjeneral Jasharit si lider ushtarak e posaçërisht në detyrën e mëparshme si Inspektor Gjeneral i FSK-së, është shumë me rëndësi për eliminimin e sfidave dhe rrugëtimin e suksesshëm përpara drejtë përmbushjes së vizionit të qartë dhe objektivave të tij operacional.

Gjatë ditës, Viehe u takua edhe me zëvendësministrin e Mbrojtjes Shemsi Syla, ku vlerësoi lart bashkëpunimin e shkëlqyeshëm të Ministrisë së Mbrojtjes dhe FSK-së me NALT-in dhe KFOR-in, duke besuar se ky bashkëpunim produktiv të vazhdojë edhe në të ardhmen.