Sporti i skijimit njihet si një sport mjaft i rrezikshëm, por edhe shumë atraktiv e popullor nëpër botë.
Ndonëse cilësohet si sport i shtrenjtë, viteve të fundit është përhapur edhe më shumë në Kosovë, ku në pah kanë dalë shumë talentë e talente të reja.
Skitarja kosovare, Klea Rudi ka filluar të merret profesionalisht me këtë sport që në fëmijëri, duke fituar çmime të shumta, me ëndrrën e përfaqësimit të Kosovës në arenën ndërkombëtare.
Në një intervistë për Telegrafin, Klea Rudi flet për arritjet e saj në këtë sport, por edhe problemet me lëndime të cilat e lanë për një kohë të gjatë jashtë garave.
Si një femër që merret me këtë sport, ajo e sheh skijimin më shumë si terapi dhe qetësim për të.
"Për mua si femër nuk është e vështirë të merrem me skijim pasi e kam si terapi dhe më qetëson, i vetmi problem janë lëndimet të cilat mund të ndodhin shumë lehtë", tha fillimisht Rudi.
Dhe pikërisht kjo i ndodhi Kleas, e cila para disa vitesh u përball me një lëndim i cili e la jashtë garave për një kohë të gjatë.
"Para disa vitesh e kam lënduar gjurin dhe nuk kam mundur të marr pjesë në gara për një kohë të gjatë. Këtë vit jam rikthyer ku mora pjesë në garën e parë ku përfundova e dyta, por një javë më vonë gjatë përgatitjeve lëndova ligamentin kryesor ACL dhe meniskusin, ku mu desh t'i nënshtrohem një operimi".
"Këtë vit nuk dihet sigurt se a do të kthehem në gara për shkak të komplikimeve në gju, por sezonin tjetër rikthimi është i sigurt", vazhdoi ajo.
Me tu rikthyer ajo përfundoi e dyta në garë, por sukseset e saj nuk munguan asnjëherë pasiqë është shpallur tri herë “Shpresë e Kosovës”.
"Jam shpallur tri herë më e mira në kategorinë time, ku në Kosovë vlerësohesh me titullin "Shpresë e Kosovës", si dhe kam marrë mirënjohje dhe kupë nga qyteti i Gjakovës për kontribut në sport".
Klea garon me klubin e skijimit të Gjakovës, por nuk harron t’i përmend edhe katër skitarët që do ta përfaqësojnë Kosovën në gara ndërkombëtare.
“Do të doja t’i përmendja katër skitarët që do të na përfaqësojnë në garat ndërkombëtare, e që jam e bindur që nuk do të kthehen në Kosovë pa trofe. Bëhet fjalë për Altin Tahiri, Arbi Popovci, Drin Kokaj dhe Kiana Kryeziu, të cilëve i uroj shumë suksese”.
Tashmë si seniore, Rudi synon të rikthehet edhe më e fortë me ëndrrën e vetme - pjesëmarrjen në garat ndërkombëtare.
"Ëndrra imi është pjesëmarrja në garat ndërkombëtare, aty ku dua ta bëj krenarë shtetin tim, familjen dhe gjithë rrethin", përfundoi skitarja kosovare, Klea Rudi.
/Telegrafi/
