Inflacioni në Eurozonë 0.5%

Norma e inflacionit në eurozonë u ngjit në 0.5 për qind gjatë muajit tetor, nga 0.4 për qind që ishte në muajin shtator. Të dhënat janë zyrtare dhe u publikuan nga Eurostat.

Sektori i shërbimeve udhëheq kështu rritjen e çmimeve, në rritje me 1.1 për qind gjatë kësaj periudhe kohore. Edhe rënia më e vogël e çmimeve të energjisë i ka dhënë një shtysë çmimeve të konsumit. Një normë inflacioni në rritje ishte paralajmëruar që prej fundjavës, kur Gjermania raportonte një normë inflacioni pranë 0.7 për qind.

Të dhënat e fundit i japin të drejtë politikave ultra-lehtësuese monetare të Bankës Qendrore Europiane, por nga ana tjetër i hedhin benzinë zjarrit për zgjatjen ose jo në kohë të programit masiv të blerjes së titujve, prej 80 miliardë euro në muaj.

Ky program projektohet të zgjasë deri në muajin mars të vitit të ardhshëm. Gjatë muajit të fundit debati për kohëzgjatjen e këtij programi ka prekur kulme të reja. Gjatë muajve të fundit ndërkohë, norma e inflacioni është rimëkëmbur me hapa të qëndrueshëm, duke dhënë shpresë dhe duke larguar përfundimisht frikën deflacioniste. /Telegrafi/