Ilir Krasniqi dhe Lumbardh Dellova të lumtur me rezultatin dhe paraqitjen

Dy yjet e Superligës së Kosovës, Lumbardh Dellova dhe Ilir Krasniqi u paraqitën në konferencën për shtyp pas ndeshjes me Zvicrën, ku u shprehën të kënaqur me barazimin që arritën ndaj Zvicrës në Bazel.

“Duhet të jemi të kënaqur, duke marrë parasysh me çfarë ekipe luajtëm, me lojtarë të top-ligave. Ndoshta mund të merrnim më shumë, por duhet të jemi të kënaqur. Jemi profesionistë të gjithë. Hyjmë çdo ndeshje për të fituar. Jemi të kënaqur me barazim. Shpresojmë ta tregojmë veten e të arrijmë sa më larg”, ka thënë Dellova i Ballkanit.

Ndërkohë, Ilir Krasniqi mes të tjerash u shpreh i lumtur për bashkëlojtarin e tij te Llapi, Muhamet Hyseni, i cili shënoi gol në debutim me fanellën e Kosovës.

“E dimë se është e vështirë dhe lojtarët e Zvicrës luajnë në top-liga. Gëzohem për të gjithë. Por këtë herë më shumë dhe shpresoj që Muhameti do ta ketë një sezon fantastik edhe me ne. Ishte ndeshje e vështirë duke ditur se kemi pasur edhe mungesa. Jemi munduar të bëjmë më të mirën tonë dhe shpresojmë të kemi rezultate të mira”, ka thënë Krasniqi./Telegrafi/