Haliti: Serbia me plan të rrezikshëm për Kosovën dhe Ballkanin

Nënkryetari i Partisë Demokratike të Kosovës (PDK), Xhavit Haliti, thotë që Serbia ka një plan të rrezikshëm për Kosovën dhe Ballkanin.

Haliti tha që përpjekja e Serbisë është që të mos arrijmë që të jemi shtete stabile.

“22 vjet nga çlirimi – Kosovën e ka gjetur në njëfarë mënyrë më shumë për shkak të mospajtimeve dhe grindjeve koti mes partive politike dhe protagonistëve të caktuar për shkaqe të shumta. Nga mos përvoja dyshoj se ka hyrë një sistem i cili është i përgatitur nga memorandumi i dytë i Akademisë së Shkencave të Serbisë, jo veç për Kosovën, por edhe për Kroacinë, Bosnjën, Maqedoninë; në përgjithësi për të gjitha ish republikat dhe krahinat që janë quajtur atëherë të Jugosllavisë”, u shpreh Haliti në Klan Kosova.

Ai theksoi se përpjekja e tyre është që as ne, as kroatët, as boshnjakët të mos arrijnë të jenë shtete stabile, dhe se shërbimet sekrete serbe nuk ndalen kurrë.

“Ato janë prezente gjithkund, në të gjitha territoret dhe kanë një histori të gjatë të veprimit, në veçanti shërbimi i ushtrisë që ka qenë KOS-i atëherë, është shumë i fuqishëm”, tha Haliti.

Tutje Haliti thotë që nuk beson që kemi një politikan që i shërben Serbisë sot në Kosovë.

“Agjenta të UDB-ës e kemi zakon dhe praktikë t’i themi njëri- tjetrit dhe kjo është akuza më e lehtë që ia bëjmë dikujt por nuk e besoj që ka një politikan që i shërben Serbisë sot në Kosovë, pasi gjenerata e re është tani në politikë. Tash ata që kanë qenë dikur, pjesa kruciale ose shtylla kurrizore e shërbimeve ka qenë lidhja e komunistave të Jugosllavisë. Këtu përfshin edhe Lidhjen e Komunistëve të Kosovës dhe këta po besoj një pjesë e madhe prej tyre janë plakur dhe janë lodhur dhe nuk e kanë rolin që e kanë pas dikur”, tha ai.