Figurat e njohura të Top Channel futen në shtëpinë e Big Brother VIP Albania 4, befasojnë finalistët

Teksa finalja e madhe po afron me hapa të shpejtë, një mbrëmje e veçantë solli emocione të forta për katër finalistët e Big Brother VIP Albania 4.

Shtëpia më e famshme në Shqipëri u vizitua nga disa prej emrave më të njohur të ekranit të Top Channel, të cilët hynë brenda për të takuar dhe përshëndetur banorët që kanë arritur në fund të rrugëtimit të tyre.

Gazetarë dhe moderatorë si Edi Manushi, Marin Mema, Ermira Çausholli, Xhemi Shehu, Bieta Sulo, Heidi Baci dhe Julian Deda ishin mes të ftuarve që u pritën me entuziazëm dhe emocion nga finalistët Gjesti, Rozana, Laerti dhe Egli.

Të pranishmit sollën një atmosferë të ngrohtë dhe miqësore, duke e shndërruar këtë vizitë në një moment të paharrueshëm për banorët.

Takimi shërbeu si një reflektim për rrugëtimin që secili prej tyre ka bërë brenda shtëpisë, por edhe si një motivim shtesë për ditët e fundit të qëndrimit. Finalistët ndanë me mysafirët e tyre përvojat më të rëndësishme, sfidat emocionale dhe lidhjet që kanë krijuar gjatë më shumë se tre muajve izolim.

Nga ana tjetër, edhe figurat publike shprehën respekt dhe vlerësim për mënyrën se si secili finalist ka përballuar rrugëtimin e tij në këtë format kaq intensiv. Ata u bënë pjesë e atmosferës festive dhe sollën një ndjenjë të fortë mbështetjeje dhe frymëzimi për banorët. /Telegrafi/