Erdogan tregoi se çfarë pret nga takimi me Putinin në Turqi

Presidenti turk, Recep Tayyip Erdogan, tha se mes një programi të ngjeshur, muajin e ardhshëm, nëse i jepet mundësia, mund të zhvillojë bisedime ballë për ballë me homologun rus, Vladimir Putin, për të diskutuar marrëveshjen e grurit të Detit të Zi.

“Në shtator, kemi takimin e G-20 në Indi dhe Asamblenë e Përgjithshme të OKB-së në SHBA. Nëse gjejmë mundësinë në këtë mjedis të ngarkuar, do të takohemi dhe bisedojmë me (Vladimir) Putinin ballë për ballë”, tha Erdogan para gazetarëve në aeroplanin presidencial, ndërsa kthehej nga vizita e tij në Hungari.

Lexo po ashtu Pas Erdoganit, Putinin e poshtëron edhe presidenti i Egjiptit

Ai bëri një vizitë njëditore në kryeqytetin Budapest për festën e ditës kombëtare të Hungarisë. Ai u takua veçmas me homologen hungareze, Katalin Novak dhe kryeministrin, Viktor Orban për të diskutuar lidhjet dypalëshe, si dhe zhvillimet rajonale dhe globale.

Ministri i Jashtëm turk, Hakan Fidan, mund të vizitojë Rusinë së shpejti për të zhvilluar bisedime ballë për ballë, tha Erdogan, duke shtuar se kjo mund të japë rezultate më të mira, raporton aa.

Për bisedimet e mundshme të paqes Rusi-Ukrainë, presidenti turk tha se shpreson të ketë rezultate nëse Putin dhe presidenti ukrainas, Volodymyr Zelensky, bien dakord për ndërmjetësimin turk.

Muajin e kaluar, Rusia pezulloi pjesëmarrjen e saj në marrëveshjen, të cilën e nënshkroi verën e kaluar së bashku me Turqinë, OKB-në dhe Ukrainën për të rifilluar eksportet e grurit nga tre porte ukrainase të Detit të Zi, të cilat u ndaluan pas fillimit të luftës Rusi-Ukrainë në shkurt të vitit 2022. Moska është ankuar vazhdimisht se pjesa ruse e marrëveshjes nuk po zbatohej.

Lexo po ashtu Erdogan i bëri Putinit 'një hakmarrje të vogël', këtë herë ishte presidenti rus ai që mbeti 'i zënë ngushtë' teksa priste homologun e tij turk

Ankaraja ka bërë përpjekje intensive në rrugë diplomatike për rifillimin e marrëveshjes.

Turqia i ka bërë vazhdimisht thirrje Kievit dhe Moskës që t’i japin fund luftës, tashmë mbi 500 ditëshe, përmes negociatave. /Telegrafi/