Emigrimi zvogëloi popullsinë e Kosovës

Edhe përkundër shtimit natyror prej 23,231 banorëve, popullsia që jeton në Kosovë është zvogëluar në vitin 2015.

Të dhënat u publikuan në raportin e Agjencisë së Statistikave “Vlerësimi i Popullsisë së Kosovës 2015”.

Sipas këtyre të dhënave, popullsia që jeton në Kosovë për shkak të emigrimit theksuar në vitin 2015 u zvogëlua për 33,340 banorë.

Sipas ASK-së numri i emigrantëve kosovarë gjatë vitit 2015 është vlerësuar të jetë 74,434 banorë, ndërsa në këtë numër janë përfshirë të gjithë emigrantët legalë dhe ata ilegalë.

Nga të dhënat e Ministrisë së Punëve të Brendshme (MPB), UNHCR, IOM dhe disa komunave, numri i të kthyerve apo riatdhesuarve në Kosovë gjatë vitit 2015 ishte gjithsej 18,862 banorë. Në këtë numër janë përfshirë imigrantët, numri i azilkërkuesve të Kosovës, si dhe lejeqëndrimet më shumë se një vit nga qytetarët e vendeve tjera.

Duke krahasuar numrin e të riatdhesuarve me ata që emigruan, ASK-ja llogariti se bilanci i emigrimit për këtë vit ishte -55,572 persona.

Por në Kosovë gjatë 2015-ës ndodhën 31,433 lindje, ndërsa numri ivdekjeve për këtë vit ishte 8,202.

Agjencia e Statistikave vlerësoi numrin e popullsisë për 2015-ën duke u bazuar në numrin e vlerësuar të popullsisë rezidente në Kosovë në fund të vitit 2014, lindshmërinë, vdekshmërinë dhe lëvizjet e popullsisë se Kosovës për periudhën 01 janar deri me 31 dhjetor 2015.

Sipas ASK-së Kosova në vitin 2015 kishte 1,771,604 banorë.

Publikimi i ASK-së konstatoi se 8,972 banorë lëvizën nga komuna në komunë vitin e kaluar.