“Dikush duhet të jap përgjegjësi”, “pushteti që vjen nga flaka veç flakë prodhon” – zjarri në IML, deklaratat e pozitës dhe reagimet e opozitës  

Të martën në orët e mëngjesit zjarri përfshiu objektin e Institutit të Mjekësisë Ligjore në Prishtinë, ku dy zyra të këtij objekti u dogjën.

Nga zjarri në IML nuk ka të lënduar, ndërkaq zjarrfikësit kanë arritur të lokalizojnë zjarrin.

Lidhur me zjarrin në Institutin e Mjekësisë Ligjore janë deklaruar edhe nga prokuroria.

Nga Prokuroria Themelore e Prishtinës, në një përgjigje për Telegrafin kanë bërë të ditur se kanë lëshuar disa autorizime për kryerjen e ekzaminimeve nga vendi i ngjarjes.

“Ju njoftojmë se me të pranuar informatën nga Policia e Kosovës lidhur me incidentin e zjarrit në Institutin e Mjekësisë Ligjore në Prishtinë, Prokurori i Shtetit ka dalë në vendin e ngjarjes bashkë me të gjitha njësitë relevante për t’i ndërmarrë të gjitha veprimet e nevojshme hetimore, me qëllim të sqarimit të shkaqeve të këtij incidenti.

Prokurori i Shtetit ka lëshuar disa autorizime për kryerjen e ekzaminimeve nga vendi i ngjarjes dhe nga të gjeturat e tyre eventualisht në rast të paraqitjes së elementeve të veprës penale, do t’i ndërmerr veprimet e mëtejme konform dispozitave të KPPRK-së”, thuhet në përgjigjen e Prokurorisë.

Prokuroria më tej ka theksuar se në koordinim të plotë me Policinë e Kosovës, IML-në dhe institucionet e tjera relevante janë duke vazhduar me ndërmarrjen e veprimeve hetimore deri në sqarimin e plotë të rastit në fjalë.

E reagimet për rastin ka pasur si nga pushteti, ashtu edhe nga opozita.

Ministrja e Drejtësisë, Albulena Haxhiu, ka deklaruar se nga zjarri që ka përfshirë këtë të martë objektin e Institutit të Mjekësisë Ligjore nuk janë djegur apo dëmtuar mbetjet mortore e as arkiva apo mostrat e këtij institucioni.

Ajo ka bërë të ditur se për zjarrin është njoftuar rreth orës 08:00 nga drejtori i IML-së, Dritor Haliti.

“Rreth orës 08:00 të mëngjesit, nga drejtori i Institutit të Mjekësisë Ligjore, Ditor Haliti, jam njoftuar që dy zyra në katin e dytë në objektin e IML, janë përfshirë nga zjarri”, ka shkruar Haxhiu në Facebook.

“Ekipet e zjarrfikësve, policia, prokuroria menjëherë kanë shkuar në vendin e ngjarjes. Nga vlerësimet fillestare, nuk ka pasur djegie ose dëmtim të mbetjeve mortore, arkivës së IML dhe mostrave”.

Ministrja tutje ka thënë se ekipet e forenzikës, ekspertët e zjarrit dhe të elektroteknikës janë ende duke e kryer punën e tyre me qëllim që të dihen shkaqet e zjarrit.

“Policia dhe prokuroria po ashtu janë duke bërë punën e tyre. Për shkak të atyre që kanë ndodhur në IML ndër vite, me të drejtë qytetarët mund të jenë të shqetësuar lidhur me këtë, mirëpo pa kuptuar shkakun e zjarrit nuk mund të japim informacione më shumë”.

“Sapo të kemi informacione më të detajuara lidhur me rastin, do të njoftojmë me kohë”, ka përfunduar ajo.

E opozita reagoi ashpër lidhur me zjarrin në IML.

Kryetari i Partisë Demokratike të Kosovës, Memli Krasniqi tha se për të dytën herë brenda një viti, Instituti i Mjekësisë Ligjore në Prishtinë po dëmtohet nga zjarre të dyshimta.

“Pas zhdukjes së mostrave të rastit të Astrit Deharit në dhjetor të vitit të kaluar dhe zjarrit të marsit të këtij viti, sot flaka kaploi disa nga zyret kryesore të këtij Instituti.

Nga të gjitha organet kompetente, kërkoj që urgjentisht të hedhin dritë mbi këtë çështje. Ndërkaq, Ministria e Drejtësisë, e cila menaxhon me këtë Institut, duhet të dalë urgjentisht me informata konkrete rreth këtij rasti!”, tha ai.

Kryetari i PDK-së po ashtu pyeti se çfarë e shkaktoi zjarrin?, çfarë u dogj dhe cilat janë dëmet?

“A janë dëmtuar prova dhe mostra të tjera, të cilat do të dëmtojnë hetimin e ndonjë rasti? Si është e mundur që edhe pas zhdukjes së mostrave të rastit Dehari, mbikëqyrja dhe niveli i sigurisë në këtë Institut të mbeten kaq të ulëta?

Mungesa e mbrojtjes së Institutit të Mjekësisë Ligjore, edhe pas dështimeve të kaluara, nuk mund të quhet më as papërgjegjësi dhe as rastësi. Tashmë, dyshimet janë edhe më të mëdha se, për qëllime të caktuara të pushtetit aktual, ky Institut është rikthyer në cak dhe në instrument politik.

Dikush duhet të jap përgjegjësi!”, tha ai.

Ndërkaq, Arben Gashi, shef i Grupit parlamentar i Lidhjes Demokratike të Kosovës, tha se pushteti që vjen nga flaka veç flakë prodhon.

“Në opozitë i kallnin institucionet, ndaj dhe në pushtet po u kallen institucionet. Sot, zjarri ka kapluar ndërtesën e Institutit të Mjekësisë Ligjore.

Mos të harrojmë se para pak kohësh zjarri përfshiu edhe Shërbimin Emergjent në Klinikën e Psikiatrisë të QKUK-së, ku për pasojë pati edhe një viktimë”, tha ai.

Ashpër reagoi edhe ish deputeti i LVV-së, Haki Abazi, aktualisht deputet i pavarur.

Ai hedhur akuza se objekti i IML-së është djegur nga vet pushteti pas marrjes në pyetje të ministres së Drejtësisë, Albulena Haxhiu.

“Njëherë e vodhën, tani e dogjën dhe në ndërkohë Ministrja e Drejtësisë bën padrejtësinë e shkelje të rëndë, duke degraduar e interferuar me shtyllën e pavarur, nga pozita e ministres dhe në prapaskenë me logon e qeverisë së republikës fyen prokurorin”, ka shkruar Abazi.

Sipas tij, ky interferim nga pozita të larta është i rrezikshëm e është i papranueshëm.

“Deklarata publike pas intervistimit nga prokurori i rastit dëshmon që komunistët nuk besojnë në drejtësinë e pavarur, nuk e durojnë drejtësinë që nuk është sipas dëshirës së tyre. Kjo sjellje dhe ky interferim nga pozita të larta është i rrezikshëm e është i papranueshëm për shoqëritë demokratike. Ky nuk është ndryshimi, ky është VetëVazhdimi!”, ka shkruar Abazi. /Telegrafi/