I dërguari i Trumpit për dialogun Kosovë-Serbi, insiston që taksa të hiqet

I dërguari i Shtëpisë së Bardhë për dialogun Kosovë-Serbi, ambasadori Richard Grenell vazhdon të insistojë që taksa 100% për produktet nga Serbia dhe Bosnja e Hercegovina, duhet të hiqet dhe kjo pa reciprocitet.

Grenell përmes një postimi në Twitter, ka shkruar se taksa duhet të hiqet dhe se heqja e saj sjell investime.

“Taksa duhet të hiqet, për të sjellë investime për punësim. Kjo është fundamentale”, ka shkruar Grenell.

Ditë më parë zëdhënësi i tij, Dick Custin tha se Grenell e inkurajon Kosovën që ta heqë taksën 100% ndaj prodhimeve të importuara nga Serbia, pa reciprocitet.

Lexo po ashtu Grenell kundër reciprocitetit ndaj Serbisë

“Kosova duhet ta heqë taksën ndaj mallrave të Serbisë, pa reciprocitet. Jo vetëm ta pezullojë taksën, por ta heqë plotësisht atë. Ambasadori nuk e mbështet idenë e reciprocitetit”, tha Custin.

Kujtojmë se kryeministri Albin Kurti ka thënë se taksa 100% do të zëvendësohet me reciprocitet të plotë ndaj Serbisë.

E zotimi i Kurtit për heqjen e taksës nxitur reagime të ashpra nga opozita në Kosovë.

Kjo bëri që Grenell t’i drejtohet Kadri Veselit, kryetarit të Partisë Demokratike të Kosovës, duke i thënë se “taksa ndaj mallrave serbe duhet të hiqet” dhe se Kurti “ka të drejtë në këtë drejtim”.

Kundër zëvendësimit të taksës me reciprocitet doli edhe ish-kryeministri Ramush Haradinaj, i cili përmes një letre publike i kërkoi kryeministrit Kurti që mos ta largojë taksën.

Kosova u ka vënë taksë 100% prodhimeve të importuara nga Serbia dhe Bosnje e Hercegovina në nëntor të vitit 2018. /Telegrafi/

https://twitter.com/RichardGrenell/status/1227198500905025536