Deputetja e VV-së, deputetëve: Ta themi njëzëri që Zajednica nuk kalon

Deputetja e Lëvizjes Vetëvendosje, Arbëreshë Kryeziu, në seancën e Kuvendit të enjten u ka bërë thirrje deputetëve që të pozicionohen kundër themelimit të Asociacionit të komunave me shumicë serbe në Kosovë.

Ajo ka thënë se insistimi i Serbisë për themelimin e Asociacionit është tendencë për destabilizimin e situatës në Kosovë.

“Serbia e cila asnjëherë nuk i ka shuar pretendimet e saj territoriale të Kosovës, e frymëzuar nga Putini disa herë është munduar që të cenojë sigurinë dhe integritetin e Kosovës përgjatë këtij një viti. Insistimi i Serbisë për themelimin e Asociacionit, bllokimi i procesit negociator dhe mospranimi për të dialoguar për planin franko-gjerman shpërfaqë hapur tendencën dhe dëshirën e tyre për destabizlimin e situatës në Kosovë”, ka deklaruar deputetja e mazhorancës.

“Serbia ka vazhduar me fushata të egra ndaj Kosovës edhe përmes ambasadorëve të saj. Jo më kot insistimi më i madh i Serbisë vazhdon të mbetet themelimi i Asociacionit. Në anën tjetër, insistimi më i madh i yni si qeveri dhe mazhorancë në Kuvend vazhdon të mbetet mosthemelimi i Asociacionit. Ky do të duhej të ishte sot insistim i të gjithëve neve sot pa dallim. Këmbëngulje e jona e përbashkët”.

Tutje, Kryeziu ka thënë se këtë deputetët ia kanë borxh atyre që janë flijuar duke e dhënë jetën për Kosovën.

“Kosova kërkon unitet dhe qëndrueshmëri. Vuçiqi po kërkon që të shtrijë ndikimin e tij në Kosovë. Merreni me mend se çka do të ndodhte në këtë vend me Zajednicën. Por, kjo nuk do të ndodh. Ne s’duhet ta lejojmë bosnjëzimin e Kosovës. Prandaj, ta themi hapur që gabimet e së kaluarës nuk do të përsëritën. Ta themi sot njëzëri që Zajednica nuk kalon”, ka përfunduar ajo. /Telegrafi/