Chelsea tregon forcën përballë kampionit (Video)

Chelsea ka arritur një fitore të vlefshme në shtëpi përballë kampionit në fuqi të Anglisë, Leicester City 3-0.

Skuadra e drejtuar nga strategu Italian Antonio Conte ishte më e mirë në fushë gjatë gjithë ndeshjes dhe me plot meritë triumfoi me rezultat të lartë.

Po rrjedhte minuta e shtatë e ndeshjes, kur vendasit kaluan në epërsi nëpërmjet sulmuesit spanjoll Diego Costa.

Edhe pas epërsisë së krijuar, Chelsea luajti më bukur dhe kështu arriti ta shënonte edhe golin e dytë në pjesën e parë.

Sulmuesi spanjoll, Pedro Rodriguez asistoi bukur tek Eden Hazard i cili pasi e kaloi edhe portierin mysafir shënoi për 2-0.

Kampionët në fuqi nuk arritën asnjëherë të rrezikojnë portën e vendasve duke dëshmuar formën e keqe që po kalojnë.

Për golin e tretë në ndeshje, u përkujdes mesfushori anësor Victor Mosses i cili realizoi 10 minuta para fundit të ndeshjes.

Pas kësaj fitore të thellë, Chelsea është ngritur në pozitën e pestë në tabelë me 16 pikë të tubuara.

Ndërkohë në javën e nëntë, londinezët përsëri do të luajnë si vendas ku do të presin ish-trajnerin e tyre Jose Mourinhon me Manchesterin e tij. a/Telegrafi/