Çfarë është Arcturus? Ekspertët thonë se ‘varianti i ri me interes’ i COVID-19 mund të ‘përhapet globalisht’

Një nënvariant i ri i COVID-19 po përhapet në SHBA dhe tani është përgjegjës për gati 10% të të gjitha rasteve të reja, sipas alarmeve nga Qendrat për Kontrollin dhe Parandalimin e Sëmundjeve (CDC) dhe Organizatës Botërore të Shëndetësisë.

Sipas mediave të huaja, përcjell Telegrafi, CDC vlerëson se lloji Omicron XBB.1.16 – më i njohur si Arcturus – ishte shkaku i 9.6% të infeksioneve të reja këtë javë.

Kjo përfaqëson një rritje nga gati 6% javën e kaluar dhe rreth 3% një javë më parë.

Dhe për shkak të rritjes së infeksioneve, Organizata Botërore e Shëndetësisë po paralajmëron publikun për mundësinë që lloji i ri mund të bëhet lloji dominues në SHBA në të ardhmen e afërt.

“Për shkak të avantazhit të tij të vlerësuar të rritjes dhe karakteristikave të arratisjes imune, XBB.1.16 mund të përhapet globalisht dhe të kontribuojë në një rritje të incidencës së rasteve”, njoftoi OBSH në një raport të ri. “Megjithatë, aktualisht, nuk ka asnjë sinjal të hershëm për një rritje të ashpërsisë”.

Andaj OBSH tani e ka vendosur Arcturus në një “variant interesi”.

Lloji Arcturus – një nga më shumë se 600 nënvariantet e Omicron – u zbulua për herë të parë në janar dhe që atëherë është zbuluar në 31 vende.

U raportua në fillim të këtij muaji se Arcturus po shkaktonte shqetësim të veçantë në Indi dhe se mund të ishte 1.2 herë më infektues se varianti Kraken.

Arcturus i ka tejkaluar variantet e tjera në Indi, duke bërë që ministria e shëndetësisë e Indisë të nisë “testimet” për të parë nëse spitalet janë të përgatitur siç duhet për të trajtuar një fluks të mundshëm pacientësh me COVID-19.

Një studim nga Universiteti i Tokios i publikuar në faqen e internetit të kërkimit biologjik bioRxiv sugjeroi se Arcturus është 1.2 herë më infektues se varianti Kraken, duke shkruar se do të “përhapet në mbarë botën në të ardhmen e afërt”. /Telegrafi/