Britney Spears ka reaguar për herë të parë pas një incidenti në një fluturim privat nga Cabo San Lucas drejt LAX, ku këngëtarja 43-vjeçare ndezi një cigare dhe piu alkool gjatë udhëtimit — gjë që çoi në ndërhyrjen e autoriteteve në tokë.
Sipas TMZ, Spears u soll në mënyrë të pazakontë gjatë fluturimit, duke shqetësuar stjuardesat që e urdhëruan të fikte cigaren.
Ajo iu bind, por pas uljes në LAX, u prit nga autoritetet dhe u paralajmërua për sjelljen e saj, shkruan DailyMail.
Në një reagim në Instagram, Spears u shfaq në një video duke ngritur dolli nga avioni dhe shkroi me ironi: “Mendova se zyrtarët më përshëndetën... U ndjeva e veçantë!” Ajo shtoi se ishte hera e parë që pinte vodka dhe e interpretoi ndalimin si keqkuptim: “Mendova se ishte një avion ku lejohej duhani”.
Spears pranoi se i kërkon falje kujtdo që u ofendua, por shpjegoi se nuk u ndje mirë me qëndrimin e stjuardesës ndaj saj.
Ajo publikoi gjithashtu një video tjetër vallëzimi në Instagram, me gotë në dorë, në sfondin e këngës "Despacito".
Kjo nuk është hera e parë që këngëtarja përballet me shqetësime publike për sjelljen e saj. Në dhjetor 2024, ajo u fotografua me një çakmak në një avion, duke shkaktuar sërish alarme për sigurinë.
Spears kishte pranuar më herët se kishte djegur palestrën e saj në vitin 2020 për shkak të një aksidenti me qirinj. /Telegrafi/
