Një front i fuqishëm me mot të keq nga veriperëndimi i kontinentit evropian, ka sjellë në rajonin e Alpeve kërcim të përnjëhershëm nga vera në dimër, njoftuan sinoptikët.

Në qendrën e skijimit Alta Badia në Itali kanë rënë 30 centimetra borë e freskët, e lagësht, ndërsa borë bie edhe në Kredarica të Sllovenisë ku temperatura në 9 të mëngjesit ka qenë minus 3 gradë Celsius, ndërsa shtresa e borës kishte arritur në 3 cm.

Gjithashtu edhe Alpet austriake janë përfshirë nga reshjet e mëdha të borës.

Deri në 30 cm dëborë raportohet të ketë rënë në Alpet austriake, shkruan inthesnow.com

Moti i pazakontë nuk është një lajm i mirë në Alpet. Në Saalbach Hinterglemm, ditë më parë, autoritetet kishin bërë një evakuim pas reshjeve të mëdha të shiut.

Ndryshim i madh i motit ka ndodhur edhe në Kroaci, ku po bie shi i rrëmbyeshëm, ndërsa temperaturat kanë rënë për mbi 10 gradë.

Gjendja më e keqe është në rajonin e Istrias, e cila gjatë natës së kaluar ishte përfshirë nga një shtrëngatë e fuqishme e cila ka shkaktuar edhe dëme të konsiderueshme në objekte të shumta.