Të gjitha polemikave se a do vazhdojë apo jo me drejtimin e Klubit Futbollistik, Vëllaznimi, Agim Cana, iu erdhi fundi. 

Menaxheri i përgjithshëm i klubit të Vëllaznimit, Besnik Gojani ka konfirmuar se Agim Cana do rikthehet në punë pas tre ditësh.

“Gjakova është me fat që ka një president klubi si zoti Cana. Çdo klub lakmon ta ketë afër një person si zoti Cana. Janë disa spekulime. Nuk e di pse ne jemi ndëshkuar si klub. Zoti Cana është momentalisht në pushime. Edhe ne jemi familjarë dhe kemi nevojë për 15 ditë pushime”, tha për RTV Dukagjinin, Besnik Gojani.

Ai thotë se Cana ka edhe përkrahjen maksimale të kryetarit të Gjakovës, Ardian Gjini.

“Kryetari Gjini ka dalë në ndihmë të klubit të Vllaznimit duke ftuar disa biznesmen që do të jenë në krahë të zotit Cana për një Vëllaznim të qëndrueshëm ku edhe do të ketë disa reforma të reja në klub”, shtoi Besnik Gojani, përcjell Telegrafi.

Menaxheri i përgjithshëm i klubit të Vëllaznimit ka thënë se nga e mërkura, Vëllaznimi me trajnerin e ri do të fillojnë përgatitjen për sezonin e ri.

“Ditën e mërkurë shefi i posa emëruar i shtabit do të formojë ekipin dhe do të startojë me përgatitje. Takimi do të jetë të mërkurën në ora 16:00”, tha ndër të tjera Besnik Gojani./RTV Dukagjini/Telegrafi/