Arsenali është mposhtur në shtëpi nga Crystal Palace me rezultat 3-2 në ndeshjen e vlefshme për javën e 35-të në Ligën Premier.

Pjesa e parë e ndeshjes u karakterizua me posedim të vendasve, raste nga të dyja skuadrat, por vetëm mysafirët gjetën golin.

Goli i vetëm në këtë pjesë erdhi në minutën e 17-të dhe ishte Christian Benteke, i cili shënoi me kokë për epërsinë 1-0.

Festa e Bentekes pas golit (Foto: Clive Rose/Getty Images/Guliver)

Në pjesën e dytë, Arsenali arriti të kthehet në lojë duke barazuar 1-1 pas vetëm dy minutave më anë të Mesut Ozil.

Megjithatë, festa e vendasve nuk zgjati shumë pasi mysafirët u përkujdesën të shënojnë dy gola të shpejt dhe ta dyfishojnë epërsinë.

Fillimisht ishte Wilfried Zaha (61′), i cili shënoi për 2-1 pas një gabimi të Shkodran Mustafit, ndërsa James McArthur (69′) shënoi për 3-1.

Zaha shfrytëzoi për mrekulli gabimin e Mustafit (Foto: Warren Little/Getty Images/Guliver)

Arsenali arriti të ngushtojë epërsinë në minutën e 77-të me anë të Pierre-Emerick Aubameyang në 3-2, por edhe përkundër rasteve të shumta ky doli të jetë rezultati përfundimtar.

Pas kësaj humbje, Arsenali mbetet në pozitën e katërt me 66 pikë, ndërsa Crystal Palace e siguron mbijetesën me 42 pikë në vendin e 12-të.

Në ndeshjen e radhës, Topçinjtë udhëtojnë te Wolves, ndërsa Crystali e pret në shtëpi Evertonin. /Telegrafi/