Pothuajse 200 vende të botës kapërcyen ndarjet politike të shtunën në mbrëmje, për të rënë dakord mbi rregullat për zbatimin e një marrëveshjeje të rëndësishme klimatike botërore, por kritikët thonë se nuk është mjaft ambicioze për të parandaluar efektet e rrezikshme të saj.

Pas dy javësh bisedime në qytetin polak të Katowicës, kombet në fund arritën konsensus mbi një kornizë më të detajuar për Marrëveshjen e Parisit 2015, e cila synon të kufizojë një rritje të temperaturave mesatare botërore në jo më tepër se 2 gradë Celsius mbi nivelet para-industriale.

“Nuk është e lehtë të gjesh marrëveshje për një çështje kaq specifike dhe teknike. Përmes kësaj pakete ju keni bërë një mijë hapa të vegjël përpara së bashku. Ju mund të ndiheni krenarë”, u tha delegatëve presidenti polak i bisedimeve, Michal Kurtyka.

Para fillimit të bisedimeve, shumë pritën që marrëveshja nuk do të ishte aq e fuqishme sa ishte e nevojshme. Uniteti që mbështeti bisedimet në Paris është copëtuar dhe presidenti i Shteteve të Bashkuara të Amerikës, Donald Trump, që synon të tërheqë vendin e tij, një nga emetuesit më të mëdhenj në botë, nga pakti. /Telegrafi/