Ambasadori amerikan Hovenier thotë sektori privat në Kosovë po luan rol të rëndësishëm

Gjatë një fjalimi kryesor në Gala Darkën e Bamirësisë të Odës Ekonomike Amerikane në Kosovë, ambasadori i Shteteve të Bashkuara të Amerikës, Jeffrey Hovenier tha se pjesëtarët e sektorit privat luajnë rol të rëndësishëm.

Hovenier theksoi se bizneset kanë rëndësi në diversifikimin e energjisë, fuqizimin ekonomik dhe sundimin e ligjit.

Duke folur për diversifikimin e energjisë, ambasadori amerikan tha se termocentralet e vjetra të Kosovës kanë ndikim të rëndësishëm në parashikueshmërinë e furnizimit me energji, në shëndetin e qytetarëve, dhe në tërheqjen e investitorëve potencialë.

Ambasadori theksoi rëndësinë e fuqizimit gjithëpërfshirës ekonomik, duke nënvizuar se 16 ditët e aktivizmit kundër dhunës gjinore. Ai tha se kur gratë gëzojnë mundësitë e barabarta të garimit në biznes, atëherë ato performojnë shumë mirë.

Hovenier kërkoi nga OEAK të luajë rol udhëheqës në shoqërinë e Kosovës për të mundësuar eliminimin e barrierave në zhvillimin profesional, dhe heqjen e pengesave me bazë gjinore ndaj njerëzve, ashtu që të gjithë të jemi kampionë të sigurimit të një mjedisi të barabartë

Po ashtu, ambasadori mirëpriti përpjekjet e Kosovës për luftimin e korrupsionit, duke shtuar se Qeveria e SHBA-së është e përfshirë në përkrahjen e këtyre përpjekjeve, duke përfshirë edhe rolin aktiv të USAID-it në themelimin e gjykatës komerciale.

Në fund, ambasadori falënderoi bizneset për ndihmën në avancimin e vizionit të përbashkët për një Kosovë sovrane, të pavarur, të suksesshme dhe prosperuese që është mision i përbashkët i Ambasadës së SHBA-së dhe i OEAK-ut. /Telegrafi/