Ali Ahmeti: Qëndroj fuqishëm në mbështetje të Kosovës në dialogun me Serbinë

Kryetari i BDI-së, Ali Ahmeti pas takimit me Albin Kurtin në Ohër thotë se qëndron fuqishëm prapa Kosovës në momentet vendimtare në dialogun me Serbinë.

“Çdo e arritur tani është e arritur për të gjithë ne, paqja stabiliteti e siguria janë thesar. Mendoj që në Ohër tanimë kanë zbarkuar shtetet e BE ka zbarkuar SHBA dhe të gjithë sytë e opinionit liridashës janë sot në Ohër, por mos harrojmë se edhe sytë e keqbërësve në Ballkan edhe ata janë sot në Ohër dhe nuk e dëshirojnë një përparim të sotëm. Jam ithtar i asaj që sot të ketë përparim dhe të verbohen ata që nuk duan paqen”, tha Ali Ahmeti, ndërsa shtoi se konsensusi do të varet nga delegacionet.

“Marrëveshja do varet prej delegacioneve. Si proces Kosova duhet të shkojë përpara drejt njohjes përfundimtare, dhe pranimi i saj në të gjitha institucionet ndërkombëtare”, tha mes tjerash Ahmeti.

Ai në një postim në Facebook shkruan se Kosova e pavarur është realitet.

Lexo po ashtu Propozimi evropian dhe plani i zbatimit, gjithçka nga takimet në Ohër

Postimi i plotë i Ahmetit:

“Qëndroj në mbështetje të fuqishme të Kosovës në momentet vendimtare në dialogun e saj me Serbinë dhe në të gjitha hapat e mëtejmë për rrumbullakësimin e plotë të shtetësisë së saj në të gjitha nivelet ndërkombëtare.

Këtë ia shpreha sot Kryeministrit të Republikës së Kosovës, z. Albin Kurti në takimin që e patëm bashkë në Ohër.

Kosova e pavarur është realitet dhe drejtësi e ardhur në vendin e vet e konfirmuar edhe nga Evropa dhe SHBA-të që nuk mund të kontestohet në asnjë mënyrë.

Inkurajova Kryeministrin Kurti për epilog pozitiv të dialogut mbi parimet e proklamuara të njohjes së ndërsjellë nga ndërmjetësuesit e BE-së që kanë qëllimin e sinqertë të ruajtjes së stabilitetit dhe ardhmërinë evropiane të mbarë Ballkanit Perëndimor”.  /Telegrafi/