Legjenda e futbollit uruguaian, Diego Forlan, është emëruar përzgjedhës i përkohshëm i Kombëtares së Uruguait pas largimit të Marcelo Bielsas, i cili dha dorëheqjen pas dështimit në Kupën e Botës 2026.
Forlan do ta kombinojë këtë detyrë me punën e tij te Kombëtarja U20 e Uruguait dhe do të drejtojë ekipin në ndeshjet miqësore të vjeshtës, derisa federata të emërojë një trajner të përhershëm në fund të këtij viti ose në fillim të vitit 2027.
Ky ndryshim vjen pasi Uruguai zhgënjeu në Kupën e Botës, duke përfunduar në vendin e tretë të grupit H me vetëm dy pikë, në një grup ku bënin pjesë edhe Kepi Verde dhe Arabia Saudite.
Për Bielsan, ky ishte dështimi i dytë për të kaluar fazën e grupeve në tri pjesëmarrje në Kupën e Botës, pasi kishte përjetuar të njëjtin fat edhe me Argjentinën në vitin 2002.
Edhe pse Uruguai pati mesatarisht 55 për qind posedim të topit gjatë turneut – shifra më e lartë në historinë e pjesëmarrjeve të tij në Kupën e Botës që nga viti 1966 dhe hera e parë që kalon 50 për qind që nga viti 1970 – kjo nuk mjaftoi për të shmangur largimin e trajnerit argjentinas.
Forlan, megjithatë, vjen me përvojë të kufizuar si trajner. Ai ka drejtuar vetëm Penarolin dhe Atenasin në nivel klubesh.
Karrierën si trajner e nisi te Penaroli në vitin 2020, por u largua pas vetëm 11 ndeshjeve për shkak të rezultateve të dobëta. Më pas, në vitin 2021, drejtoi Atenasin në kategorinë e dytë të futbollit uruguaian për 12 ndeshje.
Pavarësisht mungesës së përvojës në stol, Forlan mbetet një nga figurat më të respektuara të futbollit uruguaian. Si lojtar, ai zhvilloi 112 ndeshje me kombëtaren dhe shënoi 36 gola, duke qenë golashënuesi i tretë më i mirë në historinë e "La Celeste".
Momenti kulmor i karrierës së tij erdhi në Kupën e Botës 2010, ku shënoi pesë gola dhe udhëhoqi Uruguain deri në gjysmëfinale, ndërsa fitoi edhe çmimet "Topi i Artë" dhe "Këpuca e Artë" të turneut.
Ndeshja e parë e Diego Forlanit si përzgjedhës i Uruguait do të jetë miqësorja ndaj Japonisë më 24 shtator./Telegrafi/
